Sturka 4

Dia Muni Ai Pliska Ba Lus Tiwi Bangwan

KAIS nanara dia taki ba. Adam bara Iv ra Eden gadinka wina kangbi sakisa. Dia muni sapa nu sma ki?

Witin nani saura daukan. Baha mita Jehova bui panis munan. Witin nani dia saurka daukan sapa nu sma ki?

Gâd mita diara daukbia apia win ba dauki bangwan. Gâd mita witin nani ra win dus ma nani gadin bilara ba wina piaia sip sa. Sakuna dus kum ba baman wina pibia apia win, kan pibia sa kaka prui bangwbia. Baha dusa ba Gâd ai dukya baku bri kan. Bara yawan nu sa upla wala dukya sa kaka briaia saura ba, rait apia? Sakuna baha wina dia takan?

Yu kum Iv gadin bilara yakan kan taim, pyuta kum mita witin ra aisan. Man baha ba luki kais! Gâd mita dusa ma wina pibia apia win ba pyuta mita pibia win. Sakuna Jehova pyuta nani ra paskan taim aisi kabia dukyara paskras kan. Baha mita, upla wala bui pyutka bara yaban aisan. Sakuna uplika ba ya kan ki?

Adam apia kan. Baha mita, Jehova tasba na kau paskras kan kainara, upla nani paskan tila wina upla kum kaia kan. Baha uplika nani ba insal nani kan, yawan witin nani ra sip kaikras. Naha insalka na uba ai wîna ra tara puli kan. Witin Gâd baku diara nani sut wihtka kaia want kan bara upla nani ba Jehova bila walaia watlika ra, witin ai bila walbia want kan. Baha mita witin bui pyutka ba yaban aisan.

Naha insalka na mita Iv ra kunin munan. Witin Iv ra win dusa ma ba wina pibia sa kaka Gâd baku kabia, bara Iv ba rait lukan. Baha mita dusa ma ba pin, bara Adam sin baku daukan. Adam Iv wal Gâd bila ba alki briras kan ba mita, ai pliska gadin painkira ba lus tiwan.

Sakuna yu kum Gâd tasba aiska na Eden gadinka kan ba baku painkira daukaisa. Man nahki baha ra kaia sip sma ba dukyara kainara kaikbia. Nanara, kaisa Adam Iv wal dia takan sapa kaikaia.

Blasi sturka 2:16, 17; 3:1-13, 24; Param marikan [Reveleshan] 12:9.