Sturka 10

Lisamra Tara Ba

ARK latka tanira, upla nani ai rayaka ra dia dauki kan ba kat ban dauki bangwi kan. Lisamra tara ba balbia apia luki kan. Witin nani kau kiki kan kaia sa. Sakuna pyu kunhku bilara kiki kan ba takaski bangwan.

Ban wina mahka li auhwan. Upla kum bukit wina li laiki baku, heven pura wina li auhwi kan. Noa aisan ba rait takan! Sakuna ark ra upla kumi sin dimaia sip apia kan. Kan Jehova Gâd mita durka ba pain prakan kan.

Pyu wihka apia kan tasba aiska ba li wal pura bikan kan. Bara laya ba tingni tara nani aubi ba baku kan. Dus bara walpa tara nani ba raski bin tara dauki kan. Baha mita upla nani ba sirang iwi tasba kau purara uli kan. Witin nani mapara alai pali kan; nahki Noa bila wali, ark durka kau prakras kan bara dimaia want kan! Sakuna baha pyua ba luan kan.

Li ba kau purara uli kan. Yu 40 bara tihmia 40 baku heven pura wina li auhwan. Il tnaya nani bak li dingki, il kau purara kan nani ba sut pura bikan. Gâd aisan kan ba baku, upla bara daiwan nani sut ark bilara apia kan ba prui bangwan. Sakuna ark bilara kan nani ba sut swakwi takan.

Noa ai luhpia aikuki ark ba paskan pyua ra witin nani wark kum pain dauki bangwan kan. Li mita arkka ba tit bukan, bara li purara awi kan, bara yu kum li auhwi kan ba takaskan ningkara, yu laptika ba mahka ingwan. Bara lata tani ba uba pain pali kaiki kan! Tnaya aiska ba kabu tara kum baku kaiki kan. Dis ark ba li purara awi kan ba baman kaikaia sip kan.

Upla tara nani ba dan apu kan, witin nani kli upla nani ra rau munaia sip apia kan. Sut prui bangwan kan, ai yaptika bara upla saura wala nani ba aikuki. Sakuna aisika nani ra dia takan ki?

Uplika tara aisika nani ba, yawan tasba uplika baku apia kan. Witin nani ba insal nani heven pura wina tasba ra upla baku iwaia dukyara balan. Baha mita, lisamra tara balan pyua ra upla wala nani pruan ba baku prui bangwras kan. Upla wîna tara baku bri kan ba swisisi, kli insal nani baku taki, heven ra wih bangwan. Sakuna witin nani ra kli swiras kan Gâd lamara insal nani ba tilara dimi bangwbia. Baha mita Setan insalka nani takan. Baibil ra lasa nina makisa.

Nanara, Gâd mita yaban pasa kum krauan, bara li nani ba mahka mayara iwan. Kati matsip luan ningkara arkka ba il pura kum ra takaskan. Pyu ailal luan ningkara, ark bilara kan nani ba il bahna nani ba kaikaia sip kan. Bara li nani ba ban kau mayara iwi kan.

Baha ningkara, Noa daiwan tnawira kalatka siksa kum, nina kuskuspiram maki ba, ark wina sakan wan. Witin pâli taukisi kli Noa ra taui balan, kan ris takaia pliska sakras kan. Kli kli naku dauki kan, sakuna daiwra ba kli ark purara bal ris taki kan.

Noa brinka kan li ba pat tasba na wina rahwi iwan sapa kaikaia. Baha mita witin baku daukan ningkara, butku kum ra blikan wan. Bara butkuka ba sin kli taui balan, kan ris takaia pliska sakras kan. Sakuna aima wala ra kli blikan wan, bara witin alibit dusa wahya kum ai kakma taura brih balan. Baku tnatka ra Noa nu takan li ba pat rahwi iwan kan ba. Sakuna aima yuhmpa bilara butkuka ra kli blikan wan, bara las kat witin ris takaia plis kum sakan.

Nanara Gâd mita Noa ra naku aisan: ‘Man ark wina bal taki pamalikam bara daiwan nani ba saki brihwas.’ Witin nani mani kum pura ark bilara kan. Bara nanara witin nani kli ark wina lata ra takan ba dukyara nahki lilia kan bara man luki kais!

Blasi sturka 7:10-24; 8:1-17; 1 Pita 3:19, 20.