Sturka 5

Rayaka Iwanka Karna Kum Ba Ta Krikan

EDEN gadinka wina kangbi sakan ningkara, Adam Iv wal pât ailal wauhwan. Witin nani wark karna takaia kan plun piaia dukyara. Dus ma painkira nani pawaia watlika ra, kyaya bara rahra dusa nani pawan ai latka ra. Witin nani Gâd panika kan ba swisi, lâka nani ba lulkan taim naku takan.

Sakuna nanara diara kau saura ba sika, Adam Iv wal ba pruaia kan. Amya tikpara, Gâd mita dus ma kum ba wina pibia sa kaka prui bangwbia win kan ba. Baha mita witin nani pin pyua wina, prui bangwan. Nahki sinskas bangwi kan lukisma Gâd bila lulkan pyua ra!

Adam bara Iv luhpia nani ba Eden gadinka wina kangbi sakan ningkara aisubi takan. Naha tanka ba, luhpia nani ba pawi bara almuk taki prui bangwaia kan.

Adam Iv wal Jehova bila walan kata, ai rayaka ra ai luhpia nani aikuki lilia bangwi kaia kan. Witin nani sip kan tasba ra ban kaiara lilia iwi bangwi kaia. Upla kumi sin almuk bara siknis taki prui bangwaia apia kan.

Gâd brinka sa upla nani ba lilia laka ra ban kaiara iwi kabia, bara yu kum baku kabia pramis munisa. Tasba na baman painkira kabia apia, ban sakuna upla nani ba sin kli siknis taki bangwbia apia. Bara upla sut ba pana pain kabia, Gâd panika nani kabia.

Sakuna Iv ba, dan Gâd panika apia kan. Baha mita luhpa baikaia ba witin mapara isi apia kan. Latwan bri kan. Au, Jehova bila walras kan ba mita witin ra pât ailal balan, man baku kaikras sma ki?

Adam Iv wal luhpa ailal sahwan: mairin bara waitna nani. Ai luhpia pas aisuban ba nina Kên makan. Bara ningkara wala aisuban ba nina Ebel makan. Man nu sma witin nani ra dia takan?

Blasi sturka 3:16-23; 4:1, 2; Param marikan [Reveleshan] 21:3, 4.