Sturka 7

Waitna Kum Kupia Karna Kan Ba

TASBA ra upla nani ailal sahwan, baha tila wina aihkika ba Kên baku diara saura baman dauki kan. Sakuna waitna kum ba sat wala kan. Witin nina Inok maki kan. Inok ba waitna kum kupia karna kan. Ai tnaya ra iwi kan uplika nani ba saura baman kan, sakuna witin Gâd dukya ban dauki kan.

Dia muni baha uplika nani ba saurka dauki kan nu sma ki? Naha ra luki kais: Ya mita Adam Iv wal ra yaban Gâd bila ba lulkan, bara dus ma pibia apia win ba pin? Insal saura kum ba mita yaban daukan. Baibil ra witin nina Setan makisa. Setan trai kaikisa upla nani sut ba saura baman kabia.

Yu kum Jehova Gâd mita Inok ra upla nani sturi walaia want apia kan ba yaban aisan. Naku wibia win: ‘Yu kum Gâd upla saura nani sut ra sauhki tikaisa.’ Bankra upla nani ba naha walan taim uba ai kupia sauhki Inok ra ikaia lukan. Baha mita aitani kan Inok ba waitna kum kupia karna kaia, Gâd dia daukaia luki kan ba upla nani ra wiaia dukyara.

Gâd naha uplika saura nani tilara, Inok ra yaban uba pyu wihka iwras kan. Witin 365 mani baman iwan. Dia muni yawan “365 mani baman iwan” wisa? Kan baha pyua ra upla nani ba kau karna kan bara kau pyu wihka ra iwan. Baha mita Metusela Inok luhpia ba 969 mani iwan!

Inok pruan ningkara, upla ba kau saura taki bangwan. Baibil bila wisa ‘witin nani dia luki kan ba sut saura baman kan,’ bara ‘tasba na upla nani watauika laka ba wal bangki kan.’

Baha pyua ra tasba trabilka nani ailal kan ba dia muni takan sapa nu sma ki? Kan Setan ba tnatka raya kum bri kan upla nani ba saura dauki kabia dukyara. Kaisa baha ba dia kan sapa kaikaia.

Blasi sturka 5:21-24, 27; 6:5; Hibru nani 11:5; Judas 14, 15.