Sturka 3

Waitna bara mairin pas ba

LILKIKA na ra dia dukya sat wala kaikisma? Nanara, upla bara sa. Witin nani ba, pas waitna bara pas mairin kan. Man nu sma ki, ya mita witin nani ra paskan? Gâd mita. Bara Gâd nina dia ba nu sma ki? Ai nina ba Jehova. Waitnika nina Adam bara mairka nina ba Iv makan.

Jehova Gâd mita Adam ra naku paskan. Witin tasba yuya wiria brih, upla wîna daukra kasakkira kum paskan. Ningkara, uplika kakma ra wînka puhban, bara Adam rayakira takan.

Gâd Adam dukyara wark kum bri kan. Daiwan nani sut nina ba mangkbia win. Bankra Adam ba kaina manas wina daiwan nani ra laki kaiki kan, nina kum kau pain kaka mangkaia dukyara. Witin daiwan nani ra nina mangki kan pyua ra diara kum kaikan. Dia kan sapa nu sma ki?

Daiwan nani sut ba ai maîa wal kan. Aras wainhka bara aras mairin, layan wainhka bara layan mairin bara kan. Sakuna Adam ba ai panika mairin kum apu kan. Baha mita, Jehova bui Adam ra yaban yapan tara kum ra kauhwan, bara tnaya mina dusa kum sakan. Baha dusa wal mairin kum Adam maîa kaia paskan.

Adam ba lilia pali takan! Bara Iv ba sin gadin painkira kum ra iwai kan ba mita lilia pali takan! Nanara lika luhpa sahwi, lilia laka ra asla iwi kaia sip kan.

Jehova brinka kan Adam Iv wal ba, ban kaiara iwi kabia. Bara Eden gadinka ba baku tasba aiska na painkira dauki bangwbia. Adam Iv wal naha ra luki kasak lilia takan kaia sa! Tasba na gadin painkira kum ra lakaia help munaia ba, man brinkam sin kaia kan ki? Sakuna Adam Iv wal liliaka ba uba wihka takaskras kan. Kaisa dia muni sapa kaikaia.

Impakan sturka 6:2 (wahya mina ba); Blasi sturka 1:26 -31; 2:7-25.