Sturka 42

Biriku Mairin Kum Sturi Aisan

MAN biriku kum sturi aisan ba pat walram ki? ‘Apia, daiwan nani ba sturi aisaras’ wima. Sakuna Baibil ba, biriku mairin kum sturi aisan wisa. Kaisa nahki takan sapa kaikaia.

Israel uplika nani ba Kenan tasbaia ra dimaia pat baila pali kan. Belak, Muab kingka ba Israel uplika nani sia ikan. Baha mita, waitna saurakira kum nina Belâm maki kan ba plikaia blikan, witin ba bal Israel uplika nani ra latubia wisi. Lahla ailal yabaia pramis munan, baha mita Belâm ba ai birikuka mairin ra uli Belak ra wan.

Sakuna Jehova want apia kan Belâm ba ai uplika nani ra latubia. Baha mita, insal sord yari kum wal blikan, Belâm yabalka ra bui alki takaskbia dukyara. Belâm, insal ba ra sip kaikras kan, sakuna ai birikuka mairin ba lika kaiki kan. Biriku mairin ba insal ba wina laiura waia trai kaiki kan, bara las kat yabal ra aitnikan. Belâm ba uba ai kupia baiki dus kum wal prukan.

Bara Jehova mita birikuka mairin aisan ba Belâm walbia yaban. Bara birikuka mairin mita makabi walan: ‘Dia mai munri tawan ai prukisma ki?’

Belâm mita win: ‘Man yang ra sinskas baku ai kaikisma, baha mita yang sord kum mihti ra bri katna kaka naha kat mai ikaia kapri!’

Birikuka mita pana makabi walan: ‘Kainara yang naku mai munri ki?’

Bara Belâm win: ‘Apia.’

Ningkara, Jehova mita Belâm ra yaban insalka sordka wal, yabal ra bui kan ba kaikbia. Insalka mita win: ‘Dia muni birikukam mairin ra pruki kapram? Yang sika balri yabalkam prakaia, Israel ra latubaia wama apia dukyara. Birikukam mairin ba tnayara tauras kan kata, yang mai ikri kaia kan, sakuna biriku ba raya swiaia kapri.’

Belâm ba pana win: ‘Yang saura daukri. Yang tainka briras kapri yabalki praki kapram ba.’ Insalka ba swin Belâm ba mahka wabia, bara witin Belak ra kaikaia wisi mahka impakan. Witin ban Israel ra latubaia luki kan, sakuna Jehova mita yaban aima yuhmpa Israel ra blis munbia.

Kulki kaikan 21:21-35; 22:1-40; 23:1-30; 24:1-25.