Bras Pyutka Ba
Sturka 41
Bras Pyutka Ba
PYUTA kum dus ra aiblakwi bara ba, raya talia sa! Sakuna apia; raya apia sa. Bras wal paskan sa. Jehova mita Moses ra win baha dusa ra mangki bukbia, bara upla nani ba baha ra kaiki raya kabia dukyara. Sakuna pyuta wala nani tasba ra ba lika, rait aihwa pyutka sa. Upla nani ra saman, bara siknis taki bangwan. Dia muni sapa nu sma ki?
Kan Israel uplika nani ba Gâd bara Moses mapara aisi bangwan. Bara brukwi aisi kan: ‘Dia muni Idsipt wina ai sakram, naha upla iwras tasbaia ra pruaia? Naha ra li, plun sin apu sa. Bara yang nani manna ba pin man swapi bangwri sa.’
Sakuna manna ba plun pain kum kan. Jehova mita sain kum baku yaban. Bara li ba sin sain kum baku yaban kan. Sakuna upla nani ba Jehova main kaiki kan ba tingkika yaras kan. Baha mita Jehova naha pyutka nani ba blikan Israel uplika nani ra panis munaia dukyara. Pyuta nani ba mita saman, bara witin nani ailal ba pruan.
Tnata kat upla nani ba bal Moses ra win: ‘Yang nani Jehova mapara saura aisari bara man mampara sin aisi bangwri. Man Jehova ra puram suns naha pyuta saura nani ba sut sakbia.’
Baha mita, Moses witin nani dukyara ai pura sunan. Bara Jehova, Moses ra bras pyutka kum paskbia win. Dus kum ra mangkbia, bara pyuta nani ba yaura sambia kaka baha ra taui kaiki kabia win. Moses ba Gâd dia win ba kat daukan. Bara ya nani ra saman pyutka ra taui kaiki kli rawi kan.
Naha wina lisin kum lan takaia sip sa. Yawan sut ba Israel uplika nani pyuta mita saman kan ba baku sa. Man kaikaia sip sma, upla nani ba almuk, siknis bara prui bangwi ba, kan pas waitna bara mairin, Adam Iv wal, Jehova bila wali bangwras kan. Bara yawan sut ba witin nani luhpia sa. Sakuna Jehova yabal kum kwakisa yawan raya ban kaiara iwbia dukyara.
Jehova, ai luhpia Jisas Kraist ra, naha tasba ra blikan. Jisas ra dus kum ra sabi paman, kan upla ailal witin ba saurakira kan lukan. Sakuna Jehova, Jisas ra yaban swaki wan sakbia dukyara. Witin ra kaiki nina blikbia sa kaka, yawan raya ban kaia laka ba briaia sip kabia. Sakuna kainara naha dukyara kau lan taki kabia.
Kulki kaikan 21:4-9; Jan 3:14, 15.
