Sturka 39

Eran Dusa Ba Tangnika Baiwan

NAHA dusa wina tangni baiwi, amans tilwan man takan ba kais. Naha ba Eran dusa. Tangnika bara dusa ma nani ba tihmia kumi baman ra pawan! Kaisa dia muni sapa kaikaia.

Israel uplika nani ba upla iwras tasbaia ra pat pyu ailal impaki bangwan kan. Kum kum nani ba Moses ta bri kabia bara muihnika Eran ba prîst wihtka kabia sin want apia kan. Bara Kora ba naku luki kan uplika nani ba tilara kan. Wala nani ba Detan, Abiram bara 250 taun ta bri uplika nani ba sin baku luki kan. Bara witin nani sut ba bal, Moses ra naku win: ‘Dia muni man ba yang nani purira kau karnika bri baku damra walisma?’

Bara Moses mita Kora bara ai nina bliki kan nani ra win: ‘Yauhka titan dus mâka angkaia watlika ba brih muni, dusam mâka kia pain nani ba mangki angks. Bara Jehova tentka watla ra bal, witin yaura saki bribia sapa kaikaia.’

Bara yu wala, Kora 250 upla ai nina bliki kan nani ba aikuki Gâd tentka watla ra bali bangwan. Bara upla wala ailal sin witin nani ra ta baikaia wisi nina bliki bali bangwan kan. Jehova ba uba ai kupia sauhkan. Baha mita Moses bui upla nani ra win: ‘Naha upla saurkira nani dukya ba kangbi bangwpara bara witin nani watla wina laiura bangwi bas.’ Bara upla nani ba bila wali, Kora, Detan bara Abiram watla wina laiura taki bangwan.

Bara Moses mita witin nani ra win: ‘Tasba ba kwawi naha waitnika saurkira nani ra langkbia bara man nani nu takma Jehova yaura saki bribia ba.’

Bara Moses naku aisi dan takan minitka ra, tasba ba kwawi Kora, Detan bara Abiram watla, dukya bara ya witin aikuki kan nani ba bilara kauhwan, bara tasba ba kli ai bila prakan. Bara upla nani ba, wala nani rungwi iwuya kan ai karma kalki bangwi kan ba wali, witin nani sin kisbi naku aisan: Plapi bangws! Tasba na yawan ra sin wan langkaia sip sa!

Sakuna Kora bara 250 nina bliki kan ba Gâd tentka watla lamara kan. Baha mita Jehova bui pauta klahwan blikan, bara witin nani sut ra ami luan. Bara Jehova mita Iliasar, Eran luhpia ra, pruan nani dus mâka angkaia watlika bri kan nani ba brih slilki, altar ra pura prakanka tanta kum daukbia win. Bara naha pura prakanka altar ra daukbia ba, Israel uplika nani ra kupia kraukanka kum kaia kan, dis Eran bara ai luhpia nani ba baman Jehova prîstka bangwi kabia brin ba dukyara.

Sakuna Jehova param marikaia want kan, witin Eran bara ai luhpia nani ra baman ai prîstka nani kabia wisi bak saki brin ba dukyara. Baha mita witin Moses ra naku win: ‘Israel kyamka kumi bani wina ta uplika kum sakka ai dusa kum bribalbia, sakuna Libai kyamka wina, Eran ai dusa ba bribalbia. Bara dusa kumi bani ba brih, lâ aisi daukan bakska ba mawanra swibia. Bara yang yaura prîstki baku briri ba dusa wina, tangni baiwi pawbia.’

Bara yu wala titan Moses laki kaikan taim, Eran dusa wina naha tangnika, bara amanska tilwan nani na pawan kan! Nanara tankam brisma ki dia muni Jehova Eran dusa ra yaban tangni baiwi pawan ba?

Kulki kaikan 16:1-49; 17:1-11; 26:10.