Gibiun Uplika Sinskira Nani Ba
Sturka 48
Gibiun Uplika Sinskira Nani Ba
KENAN taunka aihkika nani ba ridi taki bangwi kan Israel mapara aiklabaia. Pura lui bangwbia luki kan. Sakuna Gibiun taunka uplika nani ba baku luki bangwras kan. Witin nani luki kan Gâd mita Israel uplika nani ra ta baiki kan, baha mita Gâd mapara aiklabaia want apia kan. Dia dauki bangwan sapa nu sma ki?
Witin nani plis wihka ra iwi bangwisa baku daukan. Kum kum nani ba kwala almuk kalwan bara klipas almuk nani diman. Ai birikuka nani purara bik almuk kalwan nani ba suni twilki bangwi kan bara brit almuk karna lawan nani ba brih impakan. Bara Jasua ra wih win: ‘Yang nani laih tasba wala wina aulna, man nani Gâdkam tara, Jehova sturka ba walri taka mita. Man nani dukyam ra Idsipt ra dia daukan ba sut wali bangwri. Baha mita taunki wihtka uplika nani mita, yang nani ra plun ridi dauki wan win, naku wih wis: ‘Yang nani man nani albikam sna. Bara pramis ai muns yang nani wal war aiklabi bangwma apia.’ Yang nani plis wihka wina impaki aulna ba mita, man nani kaikaia sip sma kwailka nani almuk taki kalwan na, bara britki nani nahki lawi karna takan na ra sin.’
Jasua bara ta uplika wala nani ba, Gibiun uplika nani win ba rait lukan. Baha mita pramis munan witin nani aikuki war aiklabaia apia. Sakuna yu yuhmpa luan bara witin nani kaikan Gibiun uplika nani ba lamara iwi bangwi kan ba.
Bara Jasua mita makabi walan: ‘Man nani dia muni kunin wan munram plis laih pali wina balram wisi?’
Bara Gibiun uplika nani pana win: ‘Kan wali bangwri man nani Gâdkam Jehova mita pramis mai munan Kenan tasbaia aiska na man nani ra maikaia. Bara wan iki bangwma sia bri kapri.’ Sakuna Israel uplika nani ba pramis munan kan ba baku, Gibiun uplika nani ra iki bangwras kan. Baha daukaia watlika ra ai albika baku brin.
Sakuna Jerusalem kingka ba uba ai kupia baikan Gibiun uplika nani ba Israel uplika aikuki kupia kumi laka ra iwaia dauki bangwan ba dukyara. Baku bara king walhwal wala nani ra naku win: ‘Bal hilp ai muni bangws Gibiun mapara aiklabaia.’ Bara witin nani asla taki king matsip taki bangwan. Sakuna Gibiun uplika Israel uplika aikuki kupia kumi laka ra iwaia daukan ba, sins laka wal daukan sa ki nanara witin nani mapara king nani aiklabaia aula kan ba? Kaisa kaikaia.
