Israel Ra Aîmplikra Kum Bara Kan
Sturka 47
Israel Ra Aîmplikra Kum Bara Kan
KAIKI KAIS naha waitnika ai watla ra diara biki ba! Dimaia kwalka painkira kum, gul dusa kum bara silba ma kum kum nani. Naha Jeriko wina sakan. Sakuna naha dukya nani ba wal, dia daukaia kan ki? Kupiam kraukisma?
Sauhki tikaia kan, bara witin nu kan gul bara silba dukya nani ba Jehova tempelka dukya kan. Baha mita naha uplika nani ba Gâd bila walras kan. Gâd dukya kan ba witin nani implikan. Waitnika nina ba Ekan, bara witin wal nani ba ai pamalika taka kum sa. Kaisa kaikaia dia takan sapa.
Ekan naha dukya nani implikan ningkara, Jasua mita waitna kum kum nani Hai taunka ra aiklabaia blikan. Sakuna witin nani ra pura luan. Kum kum nani ra ikan, bara wala nani ba plapi bangwan. Jasua uba sari takan. Ai mawan tasba ra mangki, Jehova ra ai pura suni win: ‘Dia muni swiram naku takan?’
Jehova ansika yabi win: ‘Bus! Israel uplika nani saura daukan. Diara nani sauhki tikaia apia kaka Gâd tempelka ra yabaia kan ba wina brin. Dimaia kwalka painkira kum impliki bangwan bara upla kumira sin wiras kan. Ya kwalka bara naha dukya nani implikan ba ra sauhki tikras sma kaka, yang blisin mai muni bangwamna apia.’ Jehova Jasua ra, ani waitnika baha saurka daukan ba marikaisa win.
Bara Jasua taun uplika aiskara asla daukan, bara Jehova mita tila wina waitnika saura ba ra pliki sakan, baha ba Ekan kan. Bara Ekan win: ‘Yang saura daukri. Dimaia kwalka painkira kum, gul dusa kum bara silba ma kum kum nani kaikri, bara uba brin ai dauki kan bara briri. Sut waitla bilara bikan sa, sip sma baha wina wih sakaia.’
Dukya nani ba sakan pyua ra Jasua ra bri balan, bara witin Ekan ra win: ‘Dia muni pât ra wan dingkram? Nanara Jehova mita man ra pât ra mai dingkbia!’ Bara upla nani mita Ekan ai pamalika aikuki ra walpa wal saban prui bangwan kat. Rait apia naha ba wan marikisa, diara yawan dukya apia sa kaka, briaia apia ba?
Baha ningkara Israel kli Hai mapara aiklaban. Naha pyua ra Jehova mita ai uplika nani ra ta baikan, bara witin nani aiklabi pura luan.
