Sturka 35

Jehova Ai Lâka Nani Ba Yaban

ISRAEL uplika nani ba Idsipt wina takan kati wal bri kan pyua ra, Sainai ilka ra bali bangwan bara ilka ba ra Horeb sin nina maki kan. Naha ilka ra kyaya dusa kum ami kan ba wina sika Jehova Moses ra aisan ba. Bara upla nani ba naha ra ai watla bapi; pyu wiria takaski bangwan.

Upla nani ba mayara bila kaiki kan bara Moses ba il purara uli wan. Il ra Jehova mita Moses ra win Witin want sa Israel uplika nani ba bila wali ai uplika kabia. Bara Moses ba kli mayara bal iwan taim, Jehova dia aisan ba Israel uplika nani ra sut win. Bara upla nani ba win Gâd dia aisan ba kat bila wali daukaia, kan witin nani Jehova uplika kaia want sa.

Baha wina Jehova diara aihka kum daukan. Yaban il bahna ba wina kyasma ailal taki, alwani binka nani karna taki kan. Bara witin baha wina upla nani ra aisi naku win: ‘Yang sika Jehova man nani Gâdkam, Idsipt tasbaia wina mai sakri ba.’ Baha wina witin kli Israel uplika nani ra naha lâka yaban: ‘Yang tnaiya ra gâd wala nani mayuni bangwaia apia sma.’

Baha wina Gâd mita Israel uplika nani ra lâ wala nani 9 yaban. Upla nani ba uba sibri kan. Bara witin nani Moses ra win: ‘Man yang nani ra ai aisas, kan Jehova wan aisabia kaka yang nani prui bangwamna.’

Ningkara, Jehova mita Moses ra win: ‘Man il purara uli bal. Yang lâ nani walpa tahnta wal ra ulbri ba maikaisna upliki nani dukyara.’ Baha mita Moses il purara kli aima wala uli wan. Witin yu bara tihmia 40 il bahna ra kan.

Gâd ai uplika nani ra lâ ailal yabaia bri kan. Baha lâka nani ba Moses ulban. Baku sin Gâd mita Moses ra walpa tahnta wal ba yaban. Naha walpaia nani ra, Gâd mita lâ 10 Israel uplika nani ra aisan kan ba ulban. Naha nani ra Lâ 10 nani makisa.

Lâ 10 nani ba kulkanka tara brisa. Sakuna Israel uplika nani ra lâ wala nani yaban kan ba sin kulkanka bri kan. Baha tila wina kum ba naha sa: ‘Man Jehova Gâdkam ra latwan kaikma, kupiam aiskakira, solkam aiskakira, sinska aiskakira bara karnikam aiskakira sin.’ Bara wala ba naha sa: ‘Man wînam ra latwan kaikisma ba baku uplikam ra latwan kaiks.’ Jisas Kraist Gâd Luhpia ba win, Gâd mita Israel nisanka ra lâ nani yaban kan ba tila wina, naha wal na kau tara sa. Kainara Gâd Luhpia bara ai smalkanka nani ba dukyara kau lan taki kabia.

Impakan sturka 19:1-25; 20:1-21; 24:12-18; 31:18; Kli smalkan 6:4-6; Libait laka 19:18; Matyu 22:36-40.