Jipta Pramiska Ba
Sturka 53
Jipta Pramiska Ba
YU KUM pramis kum dauki, ningkara aibapaia karna kaikram sa ki? Naha waitnika lilka ra kaikisma ba ra baku takan, baha mita sari sa. Witin nina Jipta, Israel wihtka kupia karna kum kan.
Jipta ba Israel uplika nani Jehova ra mayunras pyua ra iwi kan. Kli diara saura dauki bangwi kan. Baku kan bara, Jehova mita swin Amun uplika nani ba mita saura muni kabia. Israel uplika nani ba Jehova ra wini kan: ‘Man mampara yang nani saura dauki bangwri. Swaki wan saks!’
Upla nani ba saura ai dara wali kan diara saura nani daukan ba mita. Bara baku ai dara wali kan ba, Jehova ra kli mayuni marikan. Baha mita Jehova kli help munan.
Taun uplika nani ba Jipta ra saki brin, Amun uplika nani mapara aiklabaia dukyara. Jipta ba, Jehova helpka ailal pali nit kan naha aiklabanka ra. Baha mita Jehova ra pramis munan: ‘Man yang ra pura luanka aikma sa kaka, war aiklabisi kli taui balrika, pas upla waitla wina taki yang ra laikula ai wiaia balbia ba, man ra maikamna.’
Jehova, Jipta pramiska ba walan, bara Jipta ra pura luaia help munan. Jipta kli taui wan pyua ra, nu sma ya pas witin ra lakula wiaia wan? Ai luhpia mairin kumi pali bri kan ba. Bara Jipta ini aisan: ‘Alai, luhpi mairin! Uba sari ai daukisa! Sakuna yang Gâd ra pramis munri, bara nanara yang Jehova ra pramiski ba aibapras sip swiras sna.’
Jipta luhpia mairin ba pramiska dukyara walan taim, witin uba sari takan, ai aisika bara ai panika nani swiaia ba dukyara. Sakuna ai rayaka aiska ba, Silo tempelka ra, Jehova dukya dauki kaia kan. Bara Jipta ra win: ‘Man Jehova ra pramis munram sa kaka aibapaia sma.’
Baku bara Jipta luhpia mairin ba Silo ra wan, bara ai rayaka aiska ba tempel ra Jehova dukya dauki kan. Israel mairka nani ba, mani kum bilara aima walhwal witin ra kaikaia wi kan, bara aikuki pyu wihka lui bangwi kan. Upla nani ba Jipta luhpia mairin ra latwan kaiki kan, kan witin Jehova Gâd dukya dadaukra tyara painkira kum kan.
