Sturka 44

Rahab Biki Kakaira Nani Ra Yukukan

NAHA waitnika nani ba trabil kum brisa. Plapi bangwaia sa, ikbia apia dukyara. Israel biki kakaira nani bangwisa, bara mairka help muni ba Rahab sa. Rahab ba Jeriko taunka tnaya kutbanka ra ai watla brih iwi kan. Kaisa kaikaia naha sut ba nahki takan sapa.

Israel uplika nani ba Jordan awalka ba pat luaia lamara kan, bara Kenan tasbaia ra dimaia sin. Sakuna kau dimras kaina ra, Jasua biki kakaira wal ra bliki, naku win: ‘Tasba bara Jeriko taunka tara ba wih laki kais.’

Biki kakaira nani ba Jeriko taunka ra diman taim, Rahab watla ra wan. Sakuna upla kum mita Jeriko kingka ra naku win: ‘Tihmia ra Israel uplika wal, wan tasbaia na biki kaikaia balan.’ Bara king ba naha walan taim, Rahab watla ra waitna kum kum nani bliki naku wibia win: ‘Baha waitnika nani wamtla ra dingki brisma ba saks!’ Sakuna Rahab ai watla banhta ra waitnika nani ba yukukan kan. Baku bara Rahab mita win: ‘Waitna kum kum nani waitla ra balan, sakuna ani wina kan sapa yang nu apu sna. Tihmia iwuya kan taim mahka wih bangwan, kau taun durka ba prakras kainara. Plapi bangwma kaka sip sma bliki alkaia!’ Bara waitnika nani nina bliki wan.

Waitnika nani ba wan taim, Rahab ai watla banhta ra plapi wan. Bara biki kakaira nani ra win: ‘Yang daira walisna Jehova mita tasbaia na man nani ra maikbia ba, kan yang nani wali bangwri, man nani Idsipt wina bal takram taim, witin kabu Pauni laya lakan ba, baku sin Sihun bara Ug kingka nani ra iki bangwram ba. Yang man nani aikuki pain kapri ba baku, pramis ai muni bangws yang aikuki pain kaia. Aisiki, yaptiki, muihki bara laikra nani sut ra swaki saki bangws.’

Biki kakaira nani ba baku daukaia pramis munan, sakuna Rahab diara kum daukaia kan. Bara biki kakaira nani ba mita win: ‘Naha kiwka pauni na brih windarkam ra wilks, bara tamya nani sut ba wamtla ra asla dauks. Bara yang nani sut Jeriko taunka na briaia kli balamna taim kiwa ba kaiki, wamtla bila uplika kumira sin ikamna apia.’ Bara biki kakaira nani ba kli Jasua ra balan taim, dia takan ba sut win.

Jasua 2:1-24; Hibru nani 11:31.