Sturka 51

Rut, Neumi Wal

ULBANKA kum nina Rut maki ba Baibil ra sa. Naha na sturka kum sa Israel ra wihta nani aimaki kan pyua ra, pamali kum iwi kan ba dukyara. Rut ba Muab kuntrika tyarka kum kan; witin Israel, Gâd uplika nani ba nisanka apia kan. Sakuna Rut rait aihwa Gâdka Jehova dukyara lan takan taim, witin ra uba latwan kaikan. Neumi ba mairin pat almuk kum kan, witin Rut ra Jehova ra kakaira takbia help munan.

Neumi ba Israel uplika kan. Israel ra plun ailal apu kan pyua ra, witin ai maîa bara ai luhpia waitna wal kan ba aikuki Muab kuntrika ra wan. Yu kum, Neumi maîa ba pruan. Ningkara, luhpia waitna wal ba Muab mairka wal nina Rut bara Urpa maki kan ba brih marit taki bangwan. Sakuna 10 mani luan ningkara, Neumi luhpia wal ba sin prui bangwan. Nahki sari pali kan! Nanara, Neumi ba dia daukaia kan ki?

Yu kum Neumi kli ai uplika nani ra waia wisi ridi takan, baha ba wihka pali kan. Rut wihki Urpa wal witin lamara kaia want kan, bara witin yula kahban. Sakuna yabal bilara impaki pyu wiria bri kan pyua ra, Neumi mita tyara wal ba ra win: ‘Man nani kumi bani, kli taui yaptikam watla ra was.’

Neumi ba aisabi win kyawalanka kum wal. Witin nani ba mahka ini bangwan, kan Neumi ra uba latwan kaiki kan. Bara aisi bangwan: ‘Apia! Yang nani lika man wal tasbaiam ra wamna.’ Sakuna Neumi mita win: ‘Luhpi mairin nani, kli pliskam ra taui waia sma. Uplikam tilara wama sa kaka kau pain bangwi kama.’ Baku tnatka ra Urpa ba ai pliska ra kli taui mahka wan. Sakuna Rut ba waras kan.

Neumi ba Rut ra taui naku win: ‘Urpa ba pat wan. Man sin witin wal was.’ Sakuna Rut mita win: ‘Yang man ra mai swisisi wamna ai wipara! Ai swis man wal waia. Man ani ra wama, yang sin wamna, bara man ani ra iwma, yang sin iwamna. Man uplikan nani yang upliki kabia, man Gâdkam ba yang Gâdki kabia. Man ani ra pruma ba, yang sin baha ra prumna bara baha ra sin ai bikbia.’ Rut aisan ningkara, Neumi mita witin ra mahka taui wabia wiras kan.

Tnata kat witin wal sut Israel ra wan. Baha ra takaski bangwan. Rut ba mahka insla ra wark takan, kan barli dakaia pyua kan. Waitna kum nina Buas kan ba mita swin ai nasla ra barli daki kan. Buas yaptika ba ya kan sapa nu sma ki? Rahab kan, Jeriko taunka ba wina.

Yu kum Buas mita Rut ra win: ‘Yang man dukyam ra bara Neumi wal nahki pain sma ba dukyara ailal walri. Yang nu sna, man yaptikam, aisikam bara taunkam swisisi, taun kum kaikras kapram ra bal iwisma ba. Yang brinki sa Jehova man wal pain kabia!’

Rut mita pana win: ‘Man yang wal uba pain sma. Bila pain nani ai wiram ba wal aikram kau pain daira walisna.’ Buas ba Rut ra yamni kaiki kan, bara kaina tanira witin wal marit takan. Naha ba Neumi ra uba lilia daukan! Sakuna Neumi kau lilia takan, Buas Rut wal ai luhpia pas nina Ubit kan ba brin taim. Ningkara Ubit ba Debit damika takan; yawan Debit dukyara kainara kau lan taki kabia.

Baibil bukka Rut 1-4 ba.