Sturka 37

Tent Watla Kum Pura Suni Mayunaia Dukyara

NAHA ba dia watla kan sapa nu sma ki? Naha ba Jehova ra pura suni mayunaia tent watla kum kan. Nina Gâd tentka maki kan. Idsipt wina taki bangwan ningkara, taun uplika nani ba mani kum bilara paski dan daukan. Naha paskaia ba, ya lukanka kan sapa nu sma ki?

Jehova lukanka kan. Moses kau Sainai ilka purara kan pyua ra, Jehova mita nahki daukaia kan ba win. Slingbi twilkaia isi kabia paskbia win. Baku lika sip kan plis wala ra brisi kli paski bapi kaia. Baku tnatka ra, Israel uplika nani ba plis wala ra impaki kan pyua ra slingbi brihwi kan.

Tenka watla tnata ra, rûm kau sirpi ba bilara baks lupia kum ba ra ba kais. Naha ba, lâ aisi daukan arkka maki kan. Arkka ba tnaya kumi banira insal apia kaka kirubin nani gul wal paskan ba kum bri kan. Lâ 10 ba Gâd kli walpa tahnta wal ra ulban, kan taura ulban kan ba Moses mita baikan kan. Bara naha walpaya tahnta wal na, lâ aisi daukan arkka ba bilara dingki bri kan. Baku sin sumi kum ra manna auhbi, baha arkka bilara dingki bri kan. Manna ba dia kan sapa amya ra sa ki?

Jehova mita Moses muihnika Eran ra bak saki brin prîst wihtka kabia wisi. Taun uplika ba Jehova ra mayuni kabia dukyara witin ta brin. Bara ai luhpia nani ba sin prîst bangwi kan.

Nanara tent watla bilara, rûm kau tara kum ba ra ba kais. Rûm sirpi ba wal, dubil yahpika brisa. Baks lupia kum wina kiasma uli ba kaikisma ki? Baha ba altar, prist nani ba baha ra brisi dus mâka kia pain nani ba angki kan. Bara kaiki kais kiandil bapaika ra kiandil dusa 7 mangkan ami ba. Baku sin baha rûmka bilara diara yuhmpika bara kan ba tibil kum kan, naha purara brit 12 mangki bri kan.

Tent watla latka ra, li watlika tara kum apia kaka bisin tara kum bilara li bangki laiki bri kan. Prîst nani ba sikbaia dukyara yus muni kan. Altar tara kum sin ba ra kan. Baha ra daiwan pruan nani ba angki Jehova ra prisantka yabi kan. Tentka watla ba kyamp ba lila pas ra kan, bara Israel uplika nani ba tnaya nani ra iwi kan.

Impakan sturka 25:8-40; 26:1-37; 27:1-8; 28:1; 30:1-10, 17-21; 34:1, 2; Hibru nani 9:1-5.