Sturka 54

Waitna Kau Karna Ba

NAHA tasba ra waitna kau karna iwi kan ba nina dia sapa nu sma ki? Wihta kum nina Samson maki kan ba. Jehova mita Samson ra karnika yabi kan. Samson aisubi takras kainara, Jehova mita yaptika ra win: ‘Man pyu kunhku ra luhpa kum brima. Witin sika Israel luhpia nani ba Pilistain nani mihta wina dakbi pri sakaia ba.’

Pilistain nani ba upla saura nani Kenan tasbaia ra iwi kan nani sa. War aiklaklabra nani ailal bri kan, bara Israel uplika nani ra saura muni kan. Yu kum Pilistain nani iwi kan ba ra Samson wan taim, layan tara kum witin mapara uhbi balan. Sakuna Samsom mita ai mihta wal baman ikan. Baku sin Pilistain saurakira 100 nani ra ikan.

Ningkara Samson ba mairin kum nina Dilaila maki kan ba ra laik takan. Pilistain ta uplika nani ba Dilaila ra witin nani kumi bani wina 1.100 lalah silba ma nani yabaia pramis munan, Samsom ba ai dikia ra karnika ba brisa wibia sa kaka. Dilaila lalahka ba want kan. Witin ba rait pali Samson bara Gâd uplika panika sin apia kan. Bara witin Samson ra aima bani makabi wali kan ai karnika ba anira bri kan sapa.

Tnata kat, Samson ai karnika tanka yukukan ra bri kan ba, Dilaila ra sut win: ‘Yang aisubri wina, aima kumira sin taiwa na klakras, Gâd mita bak saki ai brin witin ai albika Nasariu baku kamna wisi. Taiwa na klakbia kaka, yang karniki sut tiwbia.’

Dilaila naha walan taim, ai praka mahta ra Samson ra yaban yapan. Bara waitna kum ra yaban dimi Samson tawa ba klakan. Samson buan taim, ai karnika ba apu kan. Bara Pilistain nani ba dimi, witin ra alki nakra daiki, tawa ba irbi apu daukan.

Yu kum Pilistain nani ba liliaka tara kum bri kan ai gâdka Dagun ra mayunaia dukyara, bara Samson ra silak wina saki brihwan lawaska kikaia wisi. Sakuna, Samson tawa ba pat pawan kan. Bara tuktan kum ai mihta ra alki brih auya kan bara Samson mita win: ‘Watla tara plamaika bapanka bara brisi mihti na mangks.’ Nanara Samson Jehova ra ai pura sunisa ai karnika yabia dukyara, bara watla plamaika nani ba alki ai karma kalki win: ‘Ai swis Pilistain nani aikuki prumna.’ Liliaka dauki kan bara Pilistain nani 3.000 bara kan, bara Samson watla tara plamaika nani ba bulkan taim, watla ba kauhwi, upla saura nani sut ikan.

Wihta nani sapta 13 wina 16 ba kat.