Sturka 58

Debit Bara Gulaiat

PILISTAIN nani ba kli Israel mapara aiklabaia wan. Debit muihnika almuk nani yuhmpa ba, Sâl war aiklaklabra daknika tilara kan. Baha mita yu kum, Jese Debit ra win: ‘Muihkam nani ra plun ma bara brit wiria brisi, nahki bangwisa sapa kaiks.’

Debit ba kyampka ra wan taim, war aiklabaia ridi kan nani tilara plapi wan, ai muihka nani pliki. Bara Pilistain waitnika tara, Gulaiat ba taki Israel uplika nani lawaska kiki kan. Yu 40 titan bara tihmia ra witin naha ba dauki kan. Pura wini aisi kan: ‘Upla kum saki bris yang wal aiklabaia. Witin ai ikbia sa kaka, yang nani ba man nani albikam kamna. Sakuna yang mita ikamna sa kaka, man nani ba yang nani albiki takma. Yang wal aiklabaia dukyara, waitna kum saki aik!’

Debit ba war aiklaklabra kum kum nani ra makabi walan: ‘Naha Pilistainka na iki, swira laka ba Israel wina diki sakbia waitnika ra, dia yabaisa ki?’

Bara war aiklaklabra kum mita win: ‘Sâl diara ailal yabaisa, ai luhpia mairin pali ba sin maîa baku yabaisa.’

Sakuna Israel uplika nani sut ba Gulaiat ra sia yabi kan, kan witin uba waitna tara kan ba mita. Witin 9 pît (mitrika yuhmpa nani baku) pura bri kan, bara war aiklaklabra wala kum mita, ai kan kahbaika ba twilkaia kan.

Bara war aiklaklabra kum kum nani ba king Sâl ra wih Debit ba Gulaiat mapara aiklabaia want sa win. Sakuna Sâl mita Debit ra win: ‘Man sip apia sma. Kan man kau wahma pali sma; man mampara witin lika waitna takan, wahma wina war aiklabisa.’ Sakuna Debit mita win: ‘Yang layan kum bara wingku tara kum ra ikri, aisiki syîpka nani brihwan pyua ra. Bara naha Pilistainka na, naha daiwra nani baku sa. Jehova mita help ai munbia.’ Bamna Sâl mita win: ‘Ban kaka was, bara Jehova man wal wabia.’

Debit ba tingni kum ra iwi, walpa lalalni matsip brih ai sakbatka ra mangkan. Bara witin tingnika wina uli, ai praukpraukika ba brih Gulaiat mapara aiklabaia wan. Gulaiat ba kaiki sip rait lukras kan, Debit ra ikaia ba uba isi kaiki kan.

Bara Gulaiat bila: ‘Nara bal, man wînam ba tnawira nani ra, daiwan wala nani ra sin yarka pibia.’ Sakuna Debit mita win: ‘Man yang maipara sord, langsa, aiklabaia dusa kum wal aulma, sakuna yang man mampara Jehova nina ra auna. Naiwa Jehova bui, mihti ra mai mangkbia, bara yang mai ikamna.’

Nanara Debit ba Gulaiat mapara plapi wan. Ai sakbatka wina walpa kum saki, ai praukpraukika ra mangki, bara ai karnika aiska ni Gulaiat ra lulkan. Walpaya kata Gulaiat lal kamhka kat diman, bara witin tungh kauhwi pruan! Pilistain nani ba ai ta uplika aiklaklabra kau pain ba pruan kaikan pyua ra, sut plapi takan. Bara Israel uplika nani mita nina bliki, war pura lui bangwan.

1 Samyuil 17:1-54.