Sturka 61

Debit Ra King Mangkan

SÂL ba, kli Debit ra alkaia trai kaikan. War aiklaklabra kau pain nani ba 3.000 brihwan Debit plikaia dukyara. Debit naha walan taim, baha tihmika Sâl ani pliska ra ai kyampka ba mangkan sapa nu takaia wisi, waitna nani ra blikan wan biki kaikbia. Bara Debit ai waitnika wal ra makabi walan: ‘Ya yang wal Sâl kyampka ra waisa?’

Bara Abisai mita win: ‘Yang waisna.’ Abisai ba Debit lakrika Seruya luhpia kan. Sâl bara ai waitnika aikuki yapi kan pyua ra, Debit Abisai wal ai kyampka ra dimi biki kaikan. Sâl lal lamara, sumika bara langsika ba ra kan ba brihwan. Upla kumi sin witin nani ra kaikras bara walras kan, kan sut ba yapi bangwi kan.

Kaiki kais Debit bara Abisai wal, swakwi il kum purara bangwi ba. Bara Debit mita Israel aiklaklabrika lalka ra wini win: ‘Abner, dia muni man wihtkam bara kingkam ra kaina kahbras sma ki? Ai langsika bara ai sumika ba anira sa sapa nu sma ki?’

Bara Sâl ba Debit bila baikra wali, rawi bui makabi walan: ‘Man sma ki, Debit?’ Sâl, Abner wal mayara bara man sip sma kaikaia?

Debit pana win: ‘Au, king dawanki yang sika.’ Ningkara Debit mita makabi walan: ‘Dia muni ai alkaia trai kaikisma ki? Dia saurka pali yang daukri? King tara langsika ba nara sa. Upla kum bliks bal brih wabia.’

Bara Sâl win: ‘Yang diara saura, bara sins laka luha wal daukri.’ Baha wina Debit kli mahka wan, bara Sâl ba kli ai watla ra taui wan. Sakuna Debit ba naku aisan: ‘Naiwa yauhka kra Sâl ai ikbia. Yang Pilistain nani kuntrika ra plapi swakwaia sna’. Bara baku daukan. Debit ba Pilistain nani ra kunin munan witin ba Pilistain uplika nani aikuki sa wisi.

Pyua luan bara Pilistain nani ba uli wan Israel mapara aiklabaia. Baha aiklabanka ra, Sâl bara Janatan wal pruan. Baha taka mita Debit ba uba sari takan bara inanka lawana painkira na aiwanan: ‘Muihki Janatan, man dukyamra kupi wihra pali sa! Yang man ra uba latwan mai kaiki kapri!’

Baha ningkara Debit kli Israel ra Hibrun taunka ra taui wan. Baha ra, Sâl luhpia waitna Is–Busit ra, king kabia saki brin uplika nani, bara Debit king kabia want kan uplika nani aikuki aiklabanka kum ba ra kan. Sakuna tnata kat Debit uplika nani ba pura luan. Debit 30 mani bri kan king aimakan taim. Hibrun ra 7 mani pura bakriki king aimakan. Witin luhpia nani kum kum baha ra aisuban ba Amnun, Absalum bara Adonaija kan.

Pyu nani luan bara, Debit bara ai waitnika aikuki taun painkira kum Jerusalem maki kan ba, dakbi briaia wan. Juab, Debit lakrika Seruya luhpia waitna wala ba, naha aiklabanka na ta brin. Baha mita Debit ba witin ra prisantka baku, aiklaklabra daknika nani lalka mangkan. Bara nanara Debit ba Jerusalem taunka ra king aimaki ta krikan.

1 Samyuil 26:1-25; 27:1-7; 31:1-6; 2 Samyuil 1:26; 3:1-21; 5:1-10; 1 Kronikas 11:1-9.