Sturka 62

Debit Watla Ra Pât Nani Ba

DEBIT Jerusalem ra king aimaki ta krikan ningkara, Jehova mita aiklaklabra daknika ra aiklabi pura luanka manas yaban. Jehova Gâd Israel uplika nani ra Kenan tasbaia ba yabaia pramis munan kan. Bara nanara, Jehova helpka wal, witin nani ra pramis munan kan tasbaia aiska ba witin nani dukya takan.

Debit ba king pain kum kan. Jehova ra latwan kaiki kan. Baha mita Jerusalem ba dakbi brin ningkara, diara pas daukan ba, Jehova wal lâ aisi daukan arkka ba baha pliska ra brihwaia. Tempel kum paski baha bilara dingkaia want kan.

Mani kum kum luan bara, Debit diara saura pali kum daukan. Witin pain nu kan diara kum upla wala dukya sa kaka briaia saura ba. Sakuna tutni kum, king watla bahna ra kan, bara witin mayara kaikan taim mairin wîna daukra uba painkira pali kum kaikan. Witin nina Batsiba bara ai maîa waitna ba, Debit aiklaklabrika kum nina Juraya kan.

Debit ba Batsiba ra uba want takan, bara mata blikan king watla ra brih wabia. Ai maîa waitna ba laiura war aiklabi kan. Bara bri balan taim, Debit mita rug munan, ningkara pliki kaikan taim mairka ba kwihra tiwan kan. Debit ba uba wari taki, Juab ai aiklaklabrika nani lalka ra win Juraya ba war aiklabi ba mawanra mangkbia, prubia dukyara. Bara Juraya pruan pyua ra, Debit Batsiba wal marit takan.

Jehova, Debit wal uba ai kupia sauhki, ai napakanka Netan ra blikan Debit saurka nani dukyara aisabia. Man sip sma Netan Debit wal nara ba kaikaia. Debit, witin daukan ba dukyara uba saura ai dara wali kan, baha mita, Jehova ikras kan. Sakuna Debit ra win: ‘Man saura daukram ba mita, wamtla bilara pât ailal brima.’ Dia pâtka ailal brin lukisma?

Pas ba, Batsiba luhpia pruan. Ningkara, Debit luhpia waitna tawahkya Amnun ba, ai lakrika mairin Timar ra taibi munan witin wal rug takbia. Naha daukan ba mita Absalum Debit luhpia wala ba uba ai kupia baiki Amnun ra ikan. Baha wina, Absalum upla nani ailal ra kupia alkan witin ra king baku bribia wisi. Sakuna tnata kat naha aiklabanka ra, Debit win takan, Absalum pruan pyua ra. Au, Debit ba pât ailal brin.

Naha trabilka nani tilara, Batsiba luhpa kum baikan, nina Salaman makan. Debit ba pat almuk bara siknis kan taim, ai luhpia waitna Adonaija ba king aimakaia trai kaiki kan. Sakuna Debit mita prîst kum nina Sadok maki kan ra, Salaman lal ra batana laya laikbia win witin king aimakbia dukyara. Pyu wihka apia kan bara Debit 70 mani bri kan pruan. Witin 40 mani king aimakan. Nanara Salaman ba king takan.

2 Samyuil 11:1-27; 12:1-18; 1 King nani 1:1-48.