Gâd, Debit Ra Saki Brin
Sturka 57
Gâd, Debit Ra Saki Brin
DIA takan ba kaikaia sip sma? Wahmka na syîpka lupia ra wingku kum wina swaki sakan. Wingkuka ba mita syîpka ra piaia brihwan kan. Sakuna wahmka ba nina bliki, wingkuka bila wina syîpka ba swaki sakan. Bara wingkuka ba ai mina ra buan taim, tuktika ba mita pruki ikan! Pyu wala ra wahmka ba layan kum wina syîp mairin kum ra swaki sakan. Rait apia wahma kum naku daukan ba, kupia karna kaia sa? Wahmka ba ya sapa nu sma ki?
Naha ba wahma Debit kan. Witin Betlehem taunka ra iwi kan. Ai damika ba Ubit kan, Rut bara Buas luhpia waitna ba. Kupiam kraukisma witin nani dukyara? Bara Debit aisika ba Jese kan. Debit ba ai aisika syîpka nani main kaiki kan. Jehova mita Sâl ra king mangkan ba wina 10 mani bri kan taim Debit ba aisuban.
Pyu luan bara Jehova mita Samyuil ra win: ‘Man batana laya pain ba brih Betlehem ra was Jese watla ra. Witin luhpia waitna nani wina kum briri king aimakbia dukyara.’ Bara Samyuil Jese luhpia waitna almuka Eliab ra kaikan taim, naku aisan: ‘Naha kaia sa.’ Sakuna Jehova mita win: ‘Mawan painka bara yarka ra sin kaikpara. Yang witin ra king baku bak saki briras.’
Bara Jese ai luhpia Abinadab ra wini Samyuil ra brihwan. Sakuna Samyuil bila: ‘Apia, Jehova witin ra bak sakras sa.’ Ningkara, Jese ai luhpia waitna Sama ra brihwan. Bara Samyuil bila win: ‘Apia, Jehova naha ra sin bak saki briras.’ Jese ai luhpia waitna 7 ba Samyuil ra brihwan, sakuna Jehova naha nani kumira sin bak saki briras kan. ‘Wahma nani na baman sa ki?’ Samyuil makabi walan.
Jese pana win: ‘Kau wahma ba baman sa. Sakuna latara syîp nani main kaikisa.’ Debit, Samyuil ra brihwan taim, kaikan wahma pranakira kum kan. Bara Jehova mita win: ‘Naha sika, batana laya ba witin purara laiks.’ Bara Samyuil baku daukan. Pyu lubia bara, Debit ba Israel kingka takbia.
