Sturka 71

Gâd Paradais Kum Pramis Munisa

NAHA lilkika na Gâd mita ai prapitka Aiseya ra, paradais kum marikan ba talia sa. Aiseya ba, Jona iwi kan pyua nani wina wihka apia kan.

Paradais tanka ba “parki” apia kaka “gadin” kum. Lilkika na, man pat naha bukka ra diara kum kaikram ba ra kupiam krauisa ki? Au, Adam Iv wal dukyara, Gâd gadin painkira kum paskan kan ba ra kupiam krauisa, rait apia? Sakuna, naha na tasba aiskara kabia ki?

Jehova mita kaina tanira ai uplika nani dukyara, paradais raya kum daukaia luki ba dukyara ai prapitka Aiseya ra ulbia win. Witin win: ‘Yul wail bara syîp nani ba laman laka ra asla iwbia. Bip lupia bara layan lupia nani ba asla pi kabia, bara tuktan sirpi nani mita main kaikbia. Bibi kum pyuta puisinkira kum lamara pulbia, sakuna witin ra saura munbia apia.’

Bankra upla ailal wibia: ‘Baku takbia apia, kan tasba ra trabil nani ba pyu ailal wina bara sa, bara ban kaiara bara kabia.’ Sakuna, luki kais, Gâd mita Adam Iv wal ra dia sat pliska yaban kan?

Gâd mita Adam Iv wal ra paradais kum ra mangkan kan. Witin nani Gâd bila lulkan mita, ai pliska painkira ba lus tiwi, almuk taki, bara prui bangwan. Gâd pramis munisa ya witin ra latwan kaiki nani ba, Adam Iv wal lus tiwan dukya nani ba yabaisa.

Kaina tanira paradais raya daukbia ba ra, diara kumi mita sin saura munbia bara sauhkbia apia. Kupia kumi kasakka laka ba bara kabia. Upla sut ba yamni bara lilia bangwi kabia, blasi pyua ra Gâd brinka kan ba baku. Kau kaina ra lan takbia Gâd nahki naha daukbia ba.

Aiseya 11:6-9; Param marikan [Reveleshan] 21:3, 4.