Sturka 66

Jesebel Kwin Saurakira Kum Ba

KING Jirubuam pruan ningkara, king laka Israel kyamka 10 yahbra wina ba king aimaki uplika nani ba sut saura bagwi kan. Kau saura ba king Ehab kan. Dia muni sapa nu sma ki? Ai maîa, kwin saura Jesebel ba mita.

Jesebel ba Israel uplika apia kan. Witin Saidon kingka luhpia marin kan. Gâd kuninkira Beal ra mayuni kan, bara daukan Ehab bara Israel uplika nani aihkika ba sin Beal ra mayunbia. Jesebel ba Jehova ra misbara kaikisa bara ai prapitka nani ailal ra ikan. Wala nani unta nani ra yukui bangwi kan ikbia sia. Jesebel ba diara kum want sa kaka, upla kum ra sut iki kan dukya ba briaia dukyara.

Yu kum king Ehab ba uba sari kan. Bara Jesebel mita makabi walan: ‘Dia muni naiwa ba uba sari sma?’

Bara Ehab mita win: ‘Kan Nabut wal aisari, bara ai wainka nasla ba ai atkbia wiri. Sakuna witin wainka nasla ba yang ra aikbia apia ai win.’

‘Bila kaiks, yang maikamna,’ Jesebel mita win.

Baku bara Jesebel mita Nabut iwi kan taunka lalka nani ra wauhtaya ulbi blikan. Bara win: ‘Waitna yus apu nani kum ra Nabut ba Gâd bara king mapara saura aisan wibia wis. Bara taun wina saki walpa ni sabi iki bangws.’

Jesebel ba Nabut pruan ba nu takan pyua ra, Ehab ra win: ‘Bus bara wainka nasla ba wih bris.’ Rait apia Jesebel ba naha dukya saura daukan ba mita panis munaia kan?

Baha mita pyu nani luan bara Jehova mita Jihu ra blikan Jesebel ra panis munbia dukyara. Jesebel ba Jihu aula kan walan taim, ai nakra nani pint munan, mairin pain baku kaikbia dukyara. Sakuna Jihu wih muni Jesebel windar ra kan ba kaikan taim, waitna nani king watla ra kan ba ra win: ‘Mairka ba bataki bangws.’ Waitnika nani bila wali daukan, lilka ra kaikisma baku. Mayara lulkan, bara witin pruan. Baku tnatka ra kwin saura Jesebel ba tnata aimakan.

1 King nani 16:29-33; 18:1-4; 21:1-16; 2 King nani 9:30-37.