Sturka 65

King Laka Ba Baiki Sakan

MAN nu sma naha waitnika dia muni ai praka kalki ba? Jehova mita baku daukbia win. Naha ba Gâd prapitka Ahias kan. Prapit kum ba dia sapa nu sma ki? Gâd mita kaina manas diara takai ba dukyara wi ba uplika sa.

Naha ra Ahias ba Jirubuam wal aisisa. Jirubuam ra, Salaman mita diara paskaia warkka nani ba yaban kan. Ahias ba Jirubuam wal yabal ra prawan taim, diara aihka kum daukan. Witin ai praka raya dimi kan ba daiki, 12 pis ra kalkan. Bara Jirubuam ra win: ‘10 pis na bris, man dukyam.’ Man nu sma dia muni Jirubuam ra 10 pis yaban?

Ahias mita Jirubuam ra tanka param win, Jehova mita Salaman ra king laka dakbai ba. Gâd mita kyamka 10 nani ba Jirubuam ra yabaisa win. Naha tanka ba kyamka wal baman takaski kan, Salaman luhpia Rihubuam ba, baha nani purara king aimakbia.

Salaman, Ahias mita Jirubuam ra naku win ba walan taim, uba ai kupia baikan. Witin Jirubuam ra ikaia trai kaikan, sakuna witin ba Idsipt ra plapan. Ningkara, Salaman ba pruan. Witin 40 mani king aimakan, sakuna nanara ai luhpia Rihubuam ba king aimakan. Jirubuam Idsipt kat walan Salaman pruan ba dukyara, bara witin kli Israel ra wan.

Rihubuam ba king pain kum apia kan. Ai aisa Salaman saura kan ba purkara kau saura kan. Jirubuam bara wala nani kulkanka bri kan ba aikuki, Rihubuam ra wih makaban upla nani aikuki kau pain kabia dukyara. Sakuna win ba walras, kau saura daukan. Baha mita, upla nani bui Jirubuam ra king mangkan kyamka 10 kan ba purara, sakuna Bensiman bara Juda kyamka nani ba ban Rihubuam ra ai kingka baku bri kan.

Jirubuam ba want apia kan, ai uplika nani ba Jerusalem ra wih Jehova tempelka ra ai pura sunbia. Baha mita witin gul wal bip lupia wal paskan, bara king laka Israel kyamka 10 ba ra yaban baha ra ai pura suni kan. Baha mita, taun ba lâ krikanka bara rau munanka lâka ni bangki takan.

Baku sin king laka kyamka wal bri kan nani ba ra pât takan. Rihubuam king aimakan wina matsip mani bri kan pyua ra, Idsipt kingka ba Jerusalem mapara aiklabaia wan. Jehova tempelka wina diara mana nani kan ba sut brihwan. Baku bara, kainara bri kan ba baku, tempel bilara diara ailal apu kan.

1 King nani 11:26-43; 12:1-33; 14:21-31.