Sturka 56

Sâl, Israel Kingka Pas Ba

KAIKI KAIS Samyuil waitnika lal ba ra batana laya laiki ba. Ya king aimakaia dukyara saki bri kan uplika ra, baku dauki kan. Jehova mita Samyuil ra win, Sâl lal purara batana laya laikbia. Batanka ba kia pain bri kan.

Sâl luki kan, witin ba uba pain apia kan king aimakaia dukyara. Baha mita witin Samyuil ra win: ‘Yang lika Bensiman kyamka wina sna, Israel kyamka sut wina kau sirpi ba. Bara dia muni yang ba king kamna wisma ki?’ Jehova mita Sâl ra yamni kaiki kan, kan witin ba tara pulras. Baha mita king aimakbia dukyara saki brin.

Sakuna Sâl ba umpira bara waitna sirpi sin apia kan. Witin pamali lalahkira kum kyamka wina kan, bara witin waitna tara kum wîna daukra pain bara yari kan. Witin pit kum baku Israel uplika wala nani ba purara kau yari kan! Pain plapi kan, bara waitna kum karna kan. Upla nani ba lilia kan Jehova bui Sâl ra king mangkan ba mita. Witin nani ai pura wini wi kan: ‘King ba raya kabia!’

Israel waihla nani ba ban karna bangwi kan. Sâl ra king mangkan pyu wiria bri kan bara, Amun uplika nani ba witin nani mapara aiklabaia wan. Sakuna Sâl, war aiklaklabra dakni tara kum asla dauki, Amun uplika nani ra pura luan. Taun uplika nani ba lilia takan Sâl ra king baku bri kaia.

Mani nani lui kan bara Sâl Israel uplika nani ta brih war nani ailal pura luan. Sâl luhpa waitna Janatan ba kupia karna kan. Bara Janatan ba Israel ra war ailal nani pura lui help munan. Pilistain nani ba Israel waihla kau saura nani kan. Yu kum, Pilistain uplika tausin nani Israel mapara wan.

Samyuil mita Sâl ra witin taui balbia kat ai bila kaikbia win, Jehova ra sakripais kum daukaia dukyara. Sakuna Samyuil ba wihka takaskan. Sâl ba sibri kan Pilistain nani ba aiklabaia ta krikbia, baha mita kainara witin silp sakripaiska ba daukan. Las kat Samyuil kli taui balan, bara bila walras kan ba mita Sâl ra palan. Baku sin win: ‘Jehova upla wala ra Israel kingka kabia dukyara saki bribia.’

Kaina tanira, Sâl kli bila walras kan. Bara Samyuil mita win: ‘Jehova bila wali daukaia ba kau yamni sa, syîp painkira nani sakripaiska daukaia ba wal. Man Jehova lâka bila nani lulki swiram ba mita, witin sin man Israel kingka kaia ba wina mai sakbia.’

Naha wina tanka pain kum lan takaia sip sa. Wan marikisa pyu bani Jehova bila walaia ba kau kanra tara sa. Baku sin wan marikisa upla kum Sâl baku painsi, saura dadaukra takaia sip sa. Aima kumira sin baku wan takbiara! Rait apia?

1 Samyuil sapta 9 wina 11 ba kat; 1 Sam. 13:5-14; 14:47-52; 15:1-35; 2 Samyuil 1:23.