Salaman King Sinskira Ba
Sturka 63
Salaman King Sinskira Ba
SALAMAN ba king aimakan taim kau wahma pali kan. Jehova ra latwan kaiki kan, bara ai aisa Debit mita lâ bila nani smalkan ba kat impaki kan. Jehova ba Salaman ra yamni kaiki kan, baha mita tihmia kum yaprisauhkanku win: ‘Salaman, dia maikamna want sma ki?’
Bara Salaman pana win: ‘Jehova Gâdki, yang kau uba wahma sna na bara nahki king aimakaia sapa nu apu sna. Baha mita, sins laka aik, man taunkam uplika purara pain king aimakaia dukyara.’
Jehova, Salaman makaban ba yamni kaikan. Baha mita win: ‘Man rayakam yari briaia bara yuyaka ailal briaia sin ai makabras kapram, baha watlika ra sins laka ai makabram ba mita, man ra sins laka ba kau ailal maikamna upla wala nani sut purkara. Bara diara nani ai makabras kapram ba maikamna, yuyaka bara pramna sin.’
Pyu kunhku ra, mairin wal pât kum lâka aisi daukaia karna kan wal Salaman ra wan. Bara mairka kum mita tanka aisi win: ‘Yang naha mairka wal utla kumira takaskisna. Yang tuktan kum baikri, bara [...] witin sin tuktan kum baikan. Tihmia kumira, ai bibika pruan. Sakuna yang yapi kapri taim, ai luhpia pruan ba yang tnayara tniki luhpi ba brih wan. Yang rawi bui tuktika pruan ba kaikri taim, yang luhpi apia kan kaikri.’
Mairka wala ba naha walisi, pana win: ‘Apia! Bibika raya ba sika yang luhpi, pruan ba lika witin luhpia!’ Bara mairka pas mita win: ‘Apia! Pruan ba lika man bibikam bara raya ba lika yang bibiki!’ Baku wal aisi blauhwi kan. Salaman bui dia daukbia ki?
Witin sord kum makaban, bara bri sal yaban bara win: ‘Bibika raya ba klaki lilak baiki saks, bara mairka kumi banira pis kum yas.’
Sakuna yaptika rait aihwa ba kisbi pura wini win: ‘Apia! Dupali bibika ba ikpara. Witin ra yas!’ Sakuna mairka wala ba bila win: ‘Apia, yang nani kumira sin wanki bangwpara; klaki baiki saks.’
Nanara Salaman bila: ‘Bibika ba ikpara! Mairka pas ba ra yas. Witin ba yaptika rait aihwa sa.’ Salaman nu kan, yaptika aihwa ba ai luhpia ra uba latwan kaiki ba mita, witin wilin kan mairka wala ba ra yabaia ikbia apia dukyara. Upla nani ba, Salaman nahki naha pâtka wapni mangkan ba wali, uba lilia taki bangwan king sinskira kum bri kan ba mita.
Salaman king aimaki kan pyua ra, Gâd mita taun uplika nani ra blisin muni, tasba wina plun ailal saki kan, plawar, barli, waham, kwah bara piaia dusa ma satka wala ailal nani sin yaban. Upla nani ba kwala pain dimi kan bara utla pain ra dimi bangwi kan sin. Upla sut dukyara diara pain nani bara kan.
