Sturka 64

Salaman Tempel Ba Paskan

PRURAS kainara, Debit mita, Jehova ai tempelka paskaia luki kan ba Salaman ra win. Salaman king aimaki mani walhwal bri kan pyua ra, tempel ba paski ta krikan, bara 7 mani pura bakriki bilara paski dan takan. Upla tausin nani wark taki kan tempel ba paskaia dukyara, gul bara silba nani yus munan ba mita uba mana pali takan kan.

Naha tempelka na rûm tara wal bri kan, tent ra kan ba baku. Sakuna tempel rûmka nani na, aima wal praiska kau tara kan, tent ra kan nani ba wal. Salaman yaban lâ aisi daukan arkka ba rûmka kau bilara dingkbia; bara diara wala tent ra kan nani ba rûmka wala ra mangkan.

Tempel ba paski dan takan taim, liliaka tara kum brih bangwan. Salaman ba tempel mawanra ai lula kriki ai pura sunan, kaikisma ba baku. Witin Jehova ra win: ‘Kasbrika aiska pali kat sin, sip alki mai takaskras sa, bara nahki naha tempelka na mai alki bribia ki? Sakuna, Gâdki, man uplikam nani naha ra bal ai pura suni bangwbia taim, pliskam pali witin nani ra wals.’

Salaman ai pura suni dan takan taim, heven wina pauta klauhwi bal iwan. Daiwan sakripaiska nani daukan kan ba angkan. Bara Jehova wina ingnika kum taki tempel watla ba bangkan. Naha marikisa Jehova ba wali bara lilia kan tempel paskan ba mita, bara Salaman ai pura sunan ba mita sin. Nanara upla nani ba, tempel ra wih Gâd ra mayuni bangwi kan, tent ra daukaia watlika ra.

Pyu ailal ra, Salaman sins laka wal king aimaki kan, bara upla nani ba lilia bangwi kan. Sakuna Salaman, kuntri wala mairka nani Jehova ra mayunras ba ailal aikuki marit takan. Mairka kum aidul ra mayuni ba kaikaia sip sma ki? Las kat witin nani mita daukan Salaman ba gâd wala nani ra mayunbia. Nanara dia takan sapa nu sma ki? Salaman ba kupia saurakira takan, bara taun uplika nani ba lilia apia kan.

Naha mita Jehova bui Salaman mapara uba ai kupia sauhki, naku win: ‘King laka ba mai dakbi upla wala ra yabaisna. Man raya sma pyua ra daukamna apia, luhpiam king aimakbia pyua ra daukamna. Sakuna luhpiam kingka laka uplika nani ba, sut mihta dakbamna apia.’ Kaisa naha dukya nani ba nahki takan sapa kaikaia.

1 Kronikas 28:9-21; 29:1-9; 1 King nani 5:1-18; 2 Kronikas 6:12-42; 7:1-5; 1 King nani 11:9-13.