Sturka 69

Tuktan Mairin Ba Almuk Ra Help Munan

NAHA tuktika mairin dia aisi ba nu sma ki? Witin mairka ba ra Jehova prapitka Ilaisya dukyara aisisa, bara Jehova mita Ilasya ra nahki help munan ba diara aihkakira nani daukbia dukyara sin wisa. Mairka ba Jehova tanka nu apu kan, kan witin Israel uplika apia kan. Baha mita kaisa kaikaia, tuktika ba dia muni mairka watla ra kan sapa.

Mairka ba Siria wina kan. Bara maîa ba Niman kan, witin ba Siria aiklablaia daknika lalka. Siria uplika nani mita tuktika mairin Israel wina ba ra alkan, bara nanara Niman maîa mairin albika kan.

Niman ba lepar sikniska saura bri kan. Naha sikniska na sip sa upla kum ra wîna piska nani ba kat sin yarka sukwi kauhwaia. Bara tuktika mairin mita Niman maîa ra win: ‘Dawanki waitna ba Israel ra wih muni, Jehova prapitka ra wabia sa kaka, witin sip sa lepar sikniska ba wina rakaia.’ Baha ningkara, sturka na maîa waitna ra sin win.

Niman ba rawaia want kan; baku bara witin Israel ra impakan. Wan taim, Ilaisya watla ra wan. Ilaisya mita ai albika ra win taki Niman ra wibia, Jordan awalka ra wih 7 taim aihtabia. Sakuna Niman ba uba ai kupia sauhki win: ‘Yang kuntriki ra awala nani bara ba kau pain sa, Israel awalka nani na wal!’ Naha aisisi, mahka wan.

Sakuna ai albika ba mita win: ‘Dawanki, Ilaisya mita diara karna kum daukma mai wibia sa kaka, man daukma. Baku sa kaka, dia muni mai win ba baku wih aihtabras sma ki?’ Niman ba ai albika nani win ba wali, Jordan awalka ra 7 taim rungwi iwan. Witin naku daukan taim, ai wîna ba pain takan bara ai sikniska ba wina sin pain takan!

Niman ba uba lilia takan. Bara witin Ilaisya ra wih naku win: ‘Nanara yang kasak daira walisna Israel Gâdka ba Gâd kumi sa tasba aiskara. Baha mita, dupali, man naha prisantka na bris.’ Sakuna Ilaisya win: ‘Apia, yang brimna apia.’ Ilaisya ba nu kan, Jehova mita Niman ra rakan kan, witin apia, baha mita prisantka ba briaia saura kan. Sakuna Gehasai ai helpika ba, witin prisantka ba briaia want kan.

Bara witin naku daukan. Niman ba mahka wan taim, witin nina bliki alki win: ‘Ilaisya mita ai blikan, witin ra prisantka kum yabaia wiram ba blikma wisa, kan bisiura upla nani ai watla ra wan bara witin nani ra yabaisa.’ Naha ba kunin kum sa. Sakuna Niman nu apu kan; baku bara Gehasai ra dukya nani kum kum yaban.

Gehasai ba kli taui wan taim, Ilaisya ba pat nu kan dia daukan kan ba. Jehova mita win kan. Bara Ilaisya mita win: ‘Man naha saurka dukram ba mita, Niman leparka ba man ra mai alkbia.’ Bara minitka ra baku takan!

Naha wina yawan dia lan takaia sip sa? Pas ba, tuktika mairin lupia daukan ba baku yawan Jehova dukyara aisaia sa. Naha ba upla ailal mapara pain kaia sip sa. Walka ba, wan wîna ra uba tara pulaia apia sa Niman kainara daukan ba baku, baha watlika ra Jehova napakanka nani ra bila walaia sa. Bara yuhmpika ba, Gehasai baku kunin aisaia apia sa. Rait apia yawan Baibil wina diara ailal lan takaia sip sa?

2 King nani 5:1-27.