Sturka 68

Tuktan Waitna Wal Kli Raya Takan

MAN pruisi, kli raya buma sa kaka, yaptikam ba nahki ai dara walbia lukisma? Witin uba lilia takbia! Sakuna upla kum pruan sa kaka sip sa kli raya buaia? Pyu luan ra, pat naku takan ki?

Lilka ra waitna, mairin bara tuktan ba kaiki kais. Waitnika ba prapit Ilaidya sa. Mairka ba, pyarka mairin Sarepat taunka wina, bara tuktika ba witin luhpia kan. Yu kum tuktika ba siknis takan. Bara kau saura taki, pruan. Bara Ilaidya mita mairka ra win: ‘Tuktika ba aik.’

Ilaidya tuktika pruan ba utla purara brihwi, krikri ra tnikan. Bara ai pura sunan: ‘Alai Jehova, tuktika na yas kli raya bubia.’ Bara tuktika ba kli ai winka puhban! Baha ningkara, Ilaidya tuktika ba brih mayara iwi, mairka ra win: ‘Luhpiam raya na kais!’ Mairka ba uba lilia takan.

Jehova prapitka wala kulkanka tara bri kan ba Ilaisya kan. Witin ba Ilaidya helpika kan. Sakuna pyu nani luan bara Jehova mita Ilaisya ra sin yaban sain nani daukan. Yu kum witin Sunim taunka ra wan, bara mairin kum ba ra kan witin wal uba pain kan. Naha sim mairka na kaina tanira luhpa waitna kum baikan.

Tuktika ba pawi tara takan pyua ra, titan kum, ai aisa unta ra wark taki kan ba ra kaikaia wan. Bara ban wina ini aisan: ‘Alai, laila uba klahwisa!’ Ai watla ra brih wan taim, pruan. Yaptika uba sari takan! Minitka ra witin Ilaisya ra pliki wan.

Ilaisya wan taim, tuktika pruan ba wal rûmka ra diman. Witin Jehova ra ai pura suni, tuktika pruan ba lama purara aitnikan. Pyu wihka apia kan tuktika taya ba lapta taki, 7 taim ai kakma trisban. Yaptika ba diman, bara witin ai luhpia ba raya kan kaikan taim, uba lilia takan!

Upla ailal pruan sa, baha mita pamalika bara panika nani ba uba sari bangwisa. Yawan upla pruan nani ra sip raki bukras sa. Sakuna Jehova lika daukaia sip sa. Yawan kau kainara kaikbia, nahki muni witin upla milian nani ra pruan wina kli bukbia ba.

1 King nani 17:8-24; 2 King nani 4:8-37.