Sturka 74

Waitna Kum Si Briras Kan Ba

UPLA nani naha wahmika lawaska kiki ba kaiki kais. Witin ba ya sapa nu sma ki? Witin Jirimaia, Gâd prapitka kum kulkanka tara bri kan ba kan.

King Jusaia mita kuntri ba wina aidul nani ra sauhki tikan pyu wihka apia kan, Jehova mita Jirimaia ra Ai prapitka kabia win. Jirimaia luki kan witin ba uba tuktan kan prapit takaia. Sakuna Jehova mita help munbia win.

Jirimaia mita Israel uplika nani ra diara saura dauki ba mahka swibia win. Kan ‘nisan uplika gâd nani ra mayuni ba, kuninkira baman sa’ win. Sakuna Israel uplika aihkika ba, aidul ra mayunaia kau lihki kan, rait aihwa Gâdka Jehova ra muyunaia watlika ra. Jirimaia mita, saura dauki bangwi ba mita Gâd bui panis munbia win taim, taun uplika nani ba lawaska kiki kan.

Mani nani luan, Jusaia ba pruan, bara kati yuhmpa luan ningkara ai luhpia waitna Jehuyakim ba king aimakan. Jirimaia ba taun uplika ra ban smalki wi kan: ‘Jerusalem ba sauhki tikan kabia kupiam laki bangwras sma kaka.’ Sakuna prîst nani ba mita witin ra alki, aisi kan: ‘Jirimaia ba pruaia sa, kan witin taun mapara aisan sa.’

Jirimaia ba dia daukan ki? Witin si briras kan! Sut ra aisi win: ‘Jehova mita ai blikan, naha dukya nani na mai aisamna. Rayakam iwanka ba lakras sma kaka, witin Jerusalem sauhkaisa. Sakuna man nani pain nu bas: Ai ikma kaka, waitna kum diara saura daukras kan ra iki bangwma ba.’

King luhpia nani ba Jirimaia ra ikras swin, ban sakuna, Israel uplika nani ba ban saura dauki kan. Baha wina Nibyukadnisar Babilun kingka ba Jerusalem mapara wih aiklaban. Tnata kat, Nibyukadnisar mita Israel uplika nani ra ai albika baku brin. Witin nani tausin Babilun ra brihwan. Upla tringsar nani mita, kuntri wala kum kaikras sma ba ra mai brihwabia sa kaka, nahki damra walma ki?

Jirimaia 1:1-8; 10:1-5; 26:1-16; 2 King nani 24:1-17.