Sturka 108

Damaskus Yabalka Ra

MAN nu sma tasba ra prawi ba ya? Witin ba Sâl kan. Stiben ra walpa ni saban waitnika nani kwalka ba witin main kaiki kan. Pura wina ingni kum balan ba kais! Dia takisa ki?

Stiben ra ikan ningkara, Sâl ba Jisas nina blablikra nani ra rau munaia wisi pliki wan. Witin Jisas nina blablikra nani ra utla bila wina saki silak ra mangki kan. Baha mita disaipel nani ailal ba taun wala ra plapi, baha ra Gâd “sturka yamni” ba smalki kan. Sakuna Sâl ba taunka wala nani ba ra wih Jisas nina blablikra nani ra pliki kan. Bara nanara, witin Damaskus ra auya kan. Sakuna yabal ra, naha dukya aihka na takan:

Ban wina, ingnika kum heven wina bal Sâl purara ingwan. Bara witin ba tasba kat kauhwan, man nara kaikisma ba baku. Bara bila baikra kum taki win: ‘Sâl! Sâl! Man dia muni yang ra saura ai munisma ki?’ Bara waitna nani Sâl aikuki kan ba sin ingnika ba kaikan bara bila baikra binka ba sin wali bangwan, sakuna witin nani tanka briras kan dia aisi kan sapa.

Bara Sâl mita pana win: ‘Man ba ya sma Dawanki?’

Bara bila baikra ba mita win: ‘Yang Jisas, man mita saura munisma ba.’ Jisas ba naku Sâl ra win, kan ai nina blablikra nani ra saura muni kan pyua ra witin ra saura munisa baku ai dara wali kan.

Bara nanara Sâl pana makabi walan: ‘Dawan yang dia daukaia sna ki?’

Bara Jisas bila: ‘Man bui, Damaskus ra dimi was, baha ra man dia daukaia sma ba mai wibia.’ Bara Sâl ba bui, ai nakra kwakan taim, witin sip diara kaikras kan. Blain takan kan! Baha mita waitna nani witin aikuki kan ba bui Damaskus ra brihwan.

Nanara Jisas ai disaipelka kum Damaskus ra kan ba ra naku aisi win: ‘Ananaias man bui, yabal kum nina Wapni maki ba ra was. Judas watla ra wih waitna kum nina Sâl maki ba dukyara makabi wals. Kan witin ba yang albiki baku bak saki briri sa.’

Bara Ananaias ba baku daukan. Witin Sâl ra kaikan taim, ai mihta ba lal purara mangki naku aisan: ‘Dawan mita ai blikan man kli kaikma dukyara bara spirit hulikira wal bangki takma sin.’ Bara minitka ra Sâl nakra wina inska taya baku taki kauhwan, bara witin sip kata kli kaikaia.

Sâl ba help tara kum kata nisan wala uplika nani ra smalkaia dukyara. Witin ra apastil Pâl baku kakaira takan, bara witin wina, yawan diara kau ailal lan taki bangwi kabia. Sakuna kaisa Gâd mita Pita ra dia daukaia yabi ba pas kaikaia.

Wark nani 8:1-4; 9:1-20; 22:6-16; 26:8-20.