Jerusalem Ra Bila Kaiki Bangwi Kan
Sturka 105
Jerusalem Ra Bila Kaiki Bangwi Kan
NAHA uplika nani ba Jisas nina blablikra nani kan. Witin nani Jisas win ba bila wali, Jerusalem ra takaski bangwan. Sut utla kum ra asla taki bila kaiki bangwi kan, bara watla ba ra bin tara kum takan. Sim pasa tara kum luya baku. Bara witin nani kumi bani lal purara pauta klauhwan lakni sirpi kum baku bal iwan. Man sip sma witin nani kumi bani lal purara ba kaikaia? Naha ba dia tanka kan?
Baha ba sain kum kan! Kan Jisas ba kli ai Aisa wal heven ra sa, baha mita witin Gâd spiritka hulikira wal ai nina blablikra nani purara laikan. Sakuna man nu sma spirit hulikira ba mita witin nani ra dia yaban daukaia? Yaban bila sat wala ra aisi bangwaia.
Pasa tara takan binka ba Jerusalem uplika nani ailal walan, bara witin nani pliska ra bali bangwan dia takan sapa kaikaia. Uplika kum kum ba nisan wala nani wina balan kan, Israel ra Pentikus yua kulki kan ba liliaka briaia dukyara. Bara witin nani kaikan, disaipel nani ba Gâd diara yamni nani daukan ba dukyara witin nani bila kat aisi kan walan taim, sirang iwi bangwan!
Bara upla nani kaikaia balan kan ba bila win: ‘Naha nani sut na Galili wina atia sa, bara nahki witin nani yawan balan ba kuntrika bila ra aisi bangwisa ki?’ Bara Pita ba ai mina ra bui mahka baha tanka dukyara smalkan. Ai bila baikra tara aisi upla nani ra smalkan nahki Jisas ra ikan kan, Jehova mita pruan wina kli bukan ba dukyara. Bara Pita bila: ‘Sakuna Jisas ba nanara heven ra Gâd mihta aihkika ra sa, bara witin pramis munan kan baku, ai spiritka laikan. Baha mita sika man nani naha sainka nani kaiki bangwisma na.’
Pita naha dukya nani na aisi dan takan ningkara, uplika ailal sari taki bangwan Jisas ra saura munan ba dukyara. Bara witin nani makabi walan: ‘Yang nani dia dauki bangwaia sna ki?’ Bara Pita bila: ‘Rayakam ba laki aihtabi taki bangws.’ Bara baha pyua ra upla 3.000 baku aihtabi takan bara witin nani ba Jisas nina blablikra taki bangwan.
