Sturka 113

Pâl Ba Rom Ra Kan

KAIKI KAIS Pâl mihta ra sen wal wilkan Rom suldiarka kum bui aihwaki kaiki ba. Pâl ba Rom ra sialaka watla ra kan, bara Rom kingka Sisar bila kaiki kan witin wal dia daukaia wibia ba.

Pâl ba Rom ra wih yu yuhmpa bri kan pyua ra, Ju nani lalka kum kum ra paiwan witin ra wih kaikbia wisi. Baha mita Ju ailal Rom ra iwi kan ba witin ra kaikaia balan. Bara Pâl mita witin nani ra Jisas bara Gâd kingka laka dukyara smalkan. Kum kum nani kasak luki, kristian taki bangwan, sakuna wala nani kasak lukras kan.

Pâl suldiar nani witin ra main kaiki kan nani ra sin smalkan. Witin ra mani wal baku baha ra silak ra bri kan pyua ra, ya nani ra smalkaia sip kan ba, sut ra smalki kan. Baku dauki kan ba mita, Gâd kingka laka yamnika sturka ba Sisar watla kat walan, bara witin nani tila wina kum kum ba kristian taki bangwan.

Sakuna tibil ra iwi wauhtaya ulbi ba ya? Baha ba Timoti kan. Witin sin Gâd kingka laka sturka smalki ba dukyara silak ra kan, sakuna nanara witin pri takan. Baha mita witin Pâl ra help munaia wisi balan. Man nu sma witin dia ulbi ba? Kaisa kaikaia.

Yawan sturi 110 ra Pilipai bara Epesus taunka nani dukyara aisan ba kupiam ra brisma ki? Pâl mita baha taunka nani ra kristian kangrigishanka nani ba paski ta kriki help munan. Nanara silak uplika baku, witin baha kristianka nani ra wauhtaya ulbi kan. Baibil ra baha wauhkataya nani ra Epesus bara Pilipai nina makisa. Pâl mita Timoti ra wi sa ai panika kristianka nani Pilipai ra kan ba ra dia ulbaia ba.

Pilipai uplika nani ba Pâl wal uba pain bangwi kan. Bara Pâl silak ra kan pyua ra witin nani mita prisantka kum bliki bangwan, baha mita Pâl bui witin nani ra tingkika yabaia ulbisa. Epaprodaitus mita Pâl ra prisantka ba bribal yaban. Sakuna Epaprodaitus ba uba siknis kan ba mita, prura luan. Bara witin pain takan pyua ra, Pilipai ra kli taui waia kan. Pâl, Timoti wal wauhtaya ulban ba, witin ra yarka brih wai kan.

Pâl Silak ra kan pyua ra wauhtaya wala wal ulban, yawan Baibil bukka nani tila ra takan kaikisa. Kum ba Kolosi kristianka nani ra blikan. Man nu sma wauhkataya ba nina dia makisa? Kolosi nani ra. Bara wauhkataya wala ba ai panika Pailimon ra blikan. Witin sin Kolosi taunka ra iwi kan. Baha wauhkataya ba Pailimon albika nina Onesimus maki kan ba dukyara ulban kan.

Onesimus ba Pailimon watla wina plapi Rom ra wan. Bara witin Pâl Rom ra silak ra kan ba dukyara nu takan, bara kaikaia wan taim, Pâl bui witin ra smalkan. Bara witin sin kristian takan. Bara witin ai dawanka watla wina plapan ba dukyara uba sari taki kan. Baha mita man nu sma ki Pâl bui ai panika Pailimon ra wauhkataya ra dia ulbi win sapa?

Pâl bui Pailimon ra makabi kan Onesimus ra padin munbia. Pâl mita ulban: ‘Yang Onesimus man ra kli mai blikisna, sakuna nanara witin ba man albikam baman apia, ban sakuna wan muihka kristian kum sa.’ Onesimus ba Kolosi ra kli taui wan pyua ra, wauhtaya wal brihwan, kum ba Kolosi nani dukya, wala ba Pailimon dukya. Man luki kaiks Pailimon nahki lilia takan ba ai albika Onesimus ba witin baku kristian takan walan pyua ra!

Pâl, Pilipai nani ra bara Pailimon ra ulban pyua ra, witin sturi yamni kum bri kan witin nani ra wiaia. Pilipai nani ra nan ulbi blikan: ‘Timoti ba man nani ra mai blikisna. Sakuna yang sin pat pali man nani ra wih mai kaikamna.’ Baha ningkara Pailimon ra sin naku ulban: ‘Yang takaskaia dukyara, plis kum ridi dauks.’

Witin silak wina takan pyua ra, ai muihka kristian nani plis ailal ra kan ba ra kli wih kaikan. Sakuna kaina tanira witin kli Rom ra silak ra kauhwan. Bara nanara ai dara wali kan witin ra ikbia. Baha mita, Timoti ra wauhtaya kum ulban pat pali witin ra balbia dukyara. Bara ulban: ‘Yang Gâd ra kasak kapri ba mita, witin maina aikbia.’ Mani kum kum Pâl pruan ningkara, Jerusalem ra kli sauhki tikan. Sakuna naha pyua ra, Rom uplika mita daukan.

Sakuna Baibil ra diara kau ulban sa. Jehova brinka kan, apastil Jan ba Baibil bukka las nani ba ulbia, baha nani tilara Param marikan (Reveleshan) bukka ba sin ulbaia kan. Kan naha ulbanka na kaina tanira diara nani takaia ba dukyara wan aisisa. Kaisa nanara kaina tanira dia takbia sapa kaikaia.

Wark nani 28:16-31; Pilipai 1:13; 2:19-30; 4:18-23; Hibru nani 13:23; Pailimon 1-25; Kolosi 4:7-9; 2 Timoti 4:7-9.