Sturka 110

Timoti, Pâl Help Mamunra Ba

NAHA ra wahma kum apastil Pâl wal kaikisma ba Timoti. Timoti ba ai pamalika aikuki Listra ra iwi kan. Ai yaptika nina Yunaisi bara ai kukika nina Lois maki kan.

Naha kat aima yuhmpa baku Pâl ba Listra ra wi kan. Pâl Barnabas wal naha ra pas bal smalkan ba wina mani kum luan kan. Bara nanara Pâl ba ai panika Sailas wal kli balan kan.

Man nu sma Pâl mita Timoti ra dia wi sapa? Witin ra wi kan: ‘Man yang Sailas wal yuli kahbi waia want sma ki? Upla wihka ra iwi nani ra sip sma smalki help ai munaia.’

Bara Timoti pana win: ‘Au, waia brinkisna.’ Bara Timoti ba pyu kunhku bilara ai pamalika swisisi Pâl Sailas wal yula kahbi impakan. Sakuna kau yawan witin nani impakanka dukyara aisaras bara, kaisa Pâl ra dia taki kan sapa kaikaia. Damaskus yabalka ra Jisas witin ra takan ba wina pat mani 17 baku luan kan.

Amya tikpara Pâl Damaskus ra wan kan ba, Jisas disaipelka nani ra rau munaia dukyara. Sakuna nanara witin pali sin disaipel kum kan! Bara waihla nani kum kum mita Pâl ra ikaia pliki kan, Pâl Jisas dukyara smalki kan ba laik apia tawan. Sakuna disaipelka nani mita witin ra swakwi takaia help munan. Witin ra baskit kum bilara mangki, taun tnaya kutbanka bakku lahbi, taun bila wina latara sakan.

Baha ningkara, Pâl Antiok ra smalkaia wan. Bara naha taunka ra sika aima pas ra disaipel nani ra kristian nina maki bangwan. Baha wina, Pâl Barnabas wal ra Antiok wina plis kau laiura blikan wan smalkaia dukyara. Pas taun ra wan ba Listra, Timoti iwi kan ba pliska.

Bara baha dauki mani kum luan ningkara, Pâl ba impakanka wala kum dauki Listra taunka ra kli balan. Man nu sma Timoti, Pâl bara Sailas aikuki impakan pyua ra, anira wih bangwan? Kaisa map ba ra kaiki taun nani nina kum kum lan takaia.

Pas ba Aikonium taunka ra wan, kan baha ba lamara kan, baha ningkara Antiok maki kan ba ra wih bangwan. Baha wina Troas ra wan, Troas ba wina Pilipai ra, Pilipai wina Tesalonaika ra bara Tesalonaika wina, Beria taunka ra wih bangwan. Atens taunka sin map ra mariki ba man sip sma kaikaia, Pâl baha ra sin smalkan. Baha ningkara, witin mani kum pura bakriki baku Korint ra smalki kan. Baha wina pyu kunhku kum Epesus ra takaski bangwan. Baha wina kli duri tara wal Sesaria ra bal, Antiok taunka ra uli bangwan, Pâl takaski kan ba pliska ra.

Bara Timoti ba Pâl ra Gâd “sturka yamni” ba smalki, kangrigishan nani ailal buki help muni, kilamitra nani ailal impaki kan. Man pawi tara takma pyua ra, Gâd napakanka kasak kum kaia want sma ki Timoti kata baku?

Wark nani 9:19–30; 11:19–26; sapta 13 wina 17 kat; Wark nani 18:1–22.

[Map]

(Ulbanka sut taki ba kaikaia dukiara, ulbi sakan ba laki kaiks)

Rom

Malta

Tesalonaika

Beria

Korint

Pilipai

Atens

Krit

Troas

Epesus

Mailitus

Kolosi

Antiok

Aikonium

Listra

Antiok

Saiprus

Damaskus

Sesaria

Jupa

Jerusalem

KABU TARA (MEDITIRINYAN)