Sturka 16

Aisak Ai Maîa Mairin Pain Kum Brin

LILKA ra mairin kum ba ya sapa nu sma ki? Witin nina Rebika makisa. Bara witin waitnika ra aula ba Aisak nina makisa. Rebika Aisak maîa mairin takaisa. Sakuna naha ba nahki takan ki?

Ebraham, Aisak aisika ba want kan ai luhpia waitna ba, ai maîa mairin pain kum bribia. Witin want apia kan Aisak ba Kenan mairka nani kum wal marit takbia, kan baha uplika nani ba gâd kuninkira nani ra mayuni kan. Baha mita Ebraham ai albika ra winan balan, naku win: ‘Yang want sna taiya nani Haran ra iwi ba ra man wih luhpi Aisak maîa mairin kum brih balma.’

Bara Ebraham albika ba minitka ra kyamil 10 brih mahka impakan. Witin Ebraham tayka nani iwi kan ba lamara wan pyua ra, liwahnta kum ra takaskan. Pat tihmia iwuya kan, bara taun mairka nani ba li pangkaia wisi liwahnta ra bal kan. Baha mita Ebraham albika ba Jehova ra naku ai pura sunan: ‘Ani mairka yang ra bara kyamilki nani ra li pangki aikbia ba, Aisak maîa baku bak sakram kaia sa.’

Tisku pali kan, Rebika li pangkaia balan. Bara Ebraham albika ba mita witin ra li diaia makaban, bara Rebika mita pangki yaban din. Baku sin li kau ailal pangkan, kyamil nani dakakaia dukyara. Baha ba wark kum karna kan, kan kyamil nani ba li ailal disa.

Bara li pangki dan takan ningkara, Ebraham albika ba mita aisika nina makabi walan. Bara tihmia ai watla ra yapaia sip sa sapa dukyara sin makabi walan. Bara Rebika bila win: ‘Aisiki nina Bityuil makisa, bara waitla ra man yapaia dukyara plis bara sa.’ Albika ba mita nu kan, Bityuil ba Ebraham muihnika Nekur luhpia kan ba. Baha mita witin ai lula kriki Jehova ra tingki win Ebraham tayka nani ra brih wan ba dukyara.

Ebraham albika ba, baha tihmika Bityuil bara Rebika lakrika Laiban ra win witin dia dukyara wan kan ba. Bara wal sut mita Rebika ba witin wal wih Aisak wal marit takaia sip ba dukyara au takan. Bara Rebika ra makabi walan taim, dia win luki? Witin sin au takan. Baha mita yu wala ba kyamil ra uli witin nani mahka Kenan tasbaia ra impakan.

Wan pyua ra, pat saiwan kan. Bara Rebika ba waitna kum yabal ra tauki kan kaikan. Baha ba Aisak kan. Bara witin Rebika ra kaiki uba lilia takan. Aisak yaptika Sara ba pruan mani yuhmpa bri kan, bara witin kau sari kan. Sakuna witin Rebika ra uba latwan kaikan ba mita kli lilia takan.

Blasi sturka 24:1-67.