Sturka 13

Ebraham–Gâd Panika Ba

LISAMRA tara luan ningkara upla dakni kum ba Ur nina maki kan pliska ra wih iwan. Ur taunka ba kulkanka tara bara utla painkira nani sin ailal bri kan. Sakuna uplika nani ba gâd kuninkira nani ra mayuni kan. Naha daukanka ba Bêbel ra sin dauki kan. Ur bara Bêbel uplika nani ba Noa ai luhpia Sîm wal Jehova dukya ban dauki kan ba baku apia kan.

Sakuna lisamra tara ba lui mani 350 bri kan pyua ra, kasak lalukra Noa ba pruan. Baha wina, mani wal luan ningkara naha waitnika lilkara kaikisma na aisubi takan. Witin ba Gâd uplika kum pain kan. Nina Ebraham maki kan bara ai pamalika wal Ur taunka ra iwi kan.

Yu kum Jehova mita Ebraham ra naku aisan: ‘Man Ur taunka ba bara tamya nani ba swisisi, yang tasba kum mai marikamna ba ra was.’ Witin Gâd bila wali Ur taunka ra diara pain nani bri kan ba sut swisisi wan luki? Au! Ebraham ba Gâd dia wi kan ba bila wali ban daukan, baha mita witin ra Gâd panika maki kan.

Ebraham pamalika tila wina kum kum nani ba witin wal Ur wina impakan. Ai aisika Tira, ai tubanka Lat, bara ai maîa mairin Sara ba sin witin wal wan. Pyu nani luan bara witin nani plis kum nina Haran maki kan ba ra wan, bara baha taunka ra aisika Tira ba pruan. Witin nani Ur taunka ba wina laiura kan.

Baha ningkara Ebraham ai pamalika aikuki Haran wina taki, Kenan tasbaia ra wan. Bara baha ra Jehova mita witin ra win: ‘Naha tasbaia sika yang luhpiam nani ra yabaisna ba.’ Baha mita Ebraham ba Kenan ra takaski tent watla kum ra iwi kan.

Bara Gâd mita Ebraham ra ta baikan bara witin syîp daknika tara bara daiwan wala nani sin ailal bri kan bara ai warkka dadaukra nani sin. Sakuna witin ai maîa Sara wal luhpa kumi sin apu kan.

Ebraham mani 99 bri kan pyua ra, Jehova bui naku witin ra aisan: ‘Yang pramis mai munisna man nisan nani ailal aisika kama.’ Sakuna, Ebraham bara Sara wal luhpa baikaia dukyara uba almuk kan ba mita, naha ba nahki sapa rait takaia sip kan ki?

Blasi sturka 11:27-32; 12:1-7; 17:1-8, 15-17; 18:9-19.