Sturka 23

Fero Yaprisauhkanka Nani Ba

MANI wal luan bara, Josep ba kau silak ra kan. Kan kap kakahbra ba witin dukyara ai kupia kraukras kan. Sakuna tihmia kum Fero yaprisauhkan wal kaikan, bara witin dia tanka bri sapa nu takaia want kan. Witin yapi ba kaikisma ki? Bara yu wala titan, witin sinskira nani bri kan ba ra sut paiwi, yaprisauhkan kaikan ba dukyara win. Sakuna baha yaprisauhkanka ba dia tanka bri kan sapa Fero ra wiaia nu apu bangwi kan.

Las kat, kap kakahbra ba Josep dukyara ai kupia kraukan. Bara witin Fero ra naku win: ‘Yang silak ra kapri pyua ra, waitna kum bara kan, witin sip kan yaprisauhkanka nani tanka ba upla nani ra wiaia.’ Bara minitka ra Fero mita blikan Josep ba silak wina saki bri balan.

Bara Fero yaprisauhkanka nani kaikan ba, Josep ra laki naku aisan: ‘Yang bip batana painkira nani 7 kaikri. Baha wina, bip byauraskira nani dusa man ba sin 7 kaikri. Bara byauraskira nani dusa man ba mita, batana nani ra pin.

‘Bara yaprisauhkanka wala ra, plauar kyama tilwan painkira ma bangki 7 pawi kan kaikri bara mina dusa kumi wina pawi kan. Baha ningkara plauar kyama ma sirpi bara lawan nani 7 pawi kan kaikri, bara plauar kyama ma sirpi bara lawan nani ba mita plauar kyama tilwan painkira ma bangki bri kan bara langki pin.’

Bara Josep pana Fero ra win: ‘Yaprisauhkankam wal sut ba sim tanka brisa. Bip batana 7 bara plauar kyama tilwan painkira ma bangki 7 kaikram ba, 7 mani tanka sa, bara bip byauraskira 7 wihki plauar kyama ma sirpi bara lawan 7 kaikram ba, 7 mani wala sa. 7 mani kum bilara Idsipt kuntrika ra plun ailal pawbia. Sakuna 7 mani wala ra plun wiria baman pawbia.’

Baha wina, Josep mita Fero ra win: ‘Man waitna sinskira kum pliki bris bara witin 7 mani pain ba bilara plun wahbi bribia. Baku lika 7 mani saura nani ba balbia pyua ra, plun wiria baman kabia taim, upla nani ba plun bla prubia apia.’

Fero baha lukanka ba pain kaikan. Bara Josep ra saki brin plun nani ba wahbi, auhbi bri kabia dukyara. Fero ningkara, Idsipt kuntrika ra Josep ba kulkanka kau tara bri kan.

Baha wina 8 mani luan plun wauhwi kan pyua ra, Josep ba waitna nani kum kum balan kaikan. Ya nani kan sapa nu sma ki? Ai muihka almuk 10 ba kan! Ai aisika Jekob mita witin nani ra Idsipt ra blikan, kan Kenan kuntrika ra plun bri kan ba dan takan kan. Josep ai muihka nani kan ba nu kan, sakuna muihnika nani ba pana witin ba ya sapa nu apu kan. Dia muni sapa nu sma ki? Kan Josep ba kau tara pawan, bara kwala sat wala dimi kan.

Josep kau tuktan kan pyua ra, yaprisauhkan ra kaikan ai muihka nani bal ai mawanra bawi kan ba dukyara kupia tang krauan. Man baha dukyara pat aisi kaikram ba amya tikpara! Baha mita Josep ai tanka brin, Gâd mita diara pain kum dukyara Idsipt kuntrika ra witin ra blikan. Sakuna Josep ba dia daukan lukisma? Kaisa kaikaia.

Blasi sturka 41:1-57; 42:1-8; 50:20.