Jekob Haran Ra Wan
Sturka 18
Jekob Haran Ra Wan
JEKOB wal aisi uplika nani ba ya sapa nu sma ki? Witin pyu wihka impakan ningkara, naha uplika nani aikuki liwahnta kum lamara prawan. Ai syîpka nani main kaiki bangwi kan. Bara Jekob mita witin nani ra makabi walan: ‘Man nani ani wina?’
Bara witin nani win: ‘Haran wina.’
‘Man nani Laiban ra kaikisma?’ Jekob mita makabi walan.
Bara witin nani bila win: ‘Au, bika luhpia mairin Retsel, naha ra ai syîpka daknika brih aula.’ Retsel aula ba kaikaia sip sma ki?
Bara Jekob, Retsel ba ai tahtika syîpka daknika wal aula kan kaikan pyua ra, witin syîpka nani ba li dibia dukyara liwahnta purara walpa ba sakan. Baha ningkara witin Retsel ra kyawali, witin ba ya kan win. Bara Retsel ba uba lilia taki ai watla ra wih ai aisika Laiban ra sut win.
Jekob ai watla ra wan ba dukyara Laiban uba lilia takan. Bara Jekob mita Retsel wal marit takaia want sa Laiban ra win pyua ra, Laiban ba uba lilia sin takan. Sakuna Laiban Jekob ra win, Retsel wal marit takaia sa kaka, witin ra 7 mani wark takbia. Jekob ba Retsel ra uba latwan kaiki kan ba mita baku daukan. Sakuna witin nani marit takaia pyua aimakan taim, dia takan sapa nu sma ki?
Laiban mita Retsel ba yabaia watlika ra, Lea ai luhpia mairin almuk ba Jekob ra yaban. Bara kli 7 mani wark takan ningkara Retsel ba Jekob ra yaban. Baha pyua ra, Gâd swin waitna nani ba ai maîa mairin ailal bribia. Sakuna Baibil mariki ba baku, naiwa pyua ra, waitna nani ba ai maîa mairin kumi baman bri kaia sa.
