Sturka 25

Jekob Pamalika Ba Idsipt Ra Impakan

JOSEP ba ai sarka dan sip yukukras! Bara witin ai albika nani sut ra rûm bila wina takbia win. Ai muihka nani baman aikuki takaskan pyua ra, mahka inan. Muihnika nani ba sirang iwan kaia sa, kan Josep ba dia dukyara ini kan sapa nu apu kan. Sakuna tnata kat Josep mita witin nani ra win: ‘Yang sika Josep. Aisiki kau raya sa?’

Bara muihka nani ba uba sirang iwi, dia wiaia sapa nu apu kan. Witin nani sibri kan. Sakuna Josep bila: ‘Dupali laimara bali bangws.’ Witin nani lamara wan pyua ra, witin naku aisan: ‘Yang sika Josep, man nani muihkam Idsipt kuntrika ra ai atkram ba.’

Josep sturi ba ban latwan laka wal nan aisi kan: ‘Ai atki bangwram ba dukyara pâtkira baku damra walpara. Raitka pali ba sika, Gâd mita upla nani rayaka swaki sakaia dukyara Idsipt ra ai blikan. Bara Fero mita kuntrika na wihtka baku ai mangkan sa. Baha mita isti pali kli taui wih, aisiki ra naha sut na wis. Bara naha ra bal iwbia wis.’

Baha ningkara, witin ai muihka nani sut ra klubi alki kyawali, mahka inan. Fero ba Josep muihka nani ba balan walan pyua ra, Josep ra win: ‘Wagin nani ba brisi, aisikam bara pamalikam nani ba brih balbia. Yang Idsipt ra tasba kau pain ba witin nani ra yabamna.’

Witin nani baku daukan. Bara Jekob ai pamalika aiska wal Idsipt ra balan pyua ra, Josep mita ai aisa ra lakula yabi ba man sip sma lilka na ra kaikaia.

Jekob pamalika ba tara takan kan. Luhpia, mula bara Jekob sut ba ra Idsipt ra impakan pyua ra 70 bangwi kan. Sakuna maîa mairin nani ba bara bankra alba ailal nani ba sin bara kan. Sut ba Idsipt kuntrika ra iwan. Witin nani ra Israel uplika nani makan, kan Gâd mita Jekob ra nina Israel makan kan. Kainara kaikbia ba baku Gâd nakra ra witin nani ba taun pain kum taki bangwan.

Blasi sturka 45:1-28; 46:1-27.