Sturka 19

Jekob Pamalika Tara Ba

NAHA pamalika tara na kaiki kais. Naha ba Jekob luhpia waitna 12 nani kan ba. Bara witin luhpa mairin nani sin bri kan. Luhpia nani ra nina dia maki kan sapa nu sma ki? Kaisa nina kum kum nani ba lan takaia.

Lea mita Ruben, Simeon, Libai bara Juda ra baikan. Bara Retsel ba luhpa sip baikras kan kaikan bara, uba sari takan. Baha mita witin Jekob ra ai albika mairin Bilha ba yaban, bara Bilha ba luhpa wal Dan bara Naptilai baikan. Bara Lea sin ai albika mairin Silpa ba Jekob ra yaban, bara Silpa ba Gad bara Asir wal baikan. Tnata kat Lea kau luhpa wal Isakar bara Sebyulon baikan.

Baha wina, Ratsel sin luhpa kum baikan. Nina Josep makan. Yawan Josep dukyara kau kainara lan takbia, kan witin ba upla kulkanka tara bri kan takan. Jekob kau Laiban lamara iwi kan pyua ra naha luhpia 11 nani na aisubi takan.

Jekob ba luhpa mairin nani sin bri kan, sakuna Baibil ba kumi baman dukyara aisisa, nina ba Dina.

Jekob Laiban ra swisisi, kli Kenan ra waia pyua ba aimakan kan. Baha mita witin ai pamalika, syîp daknika bara daiwan wala nani bri kan ba sut asla praki mahka impakan.

Witin ai pamalika aikuki Kenan ra impakan wihka apia kan bara, Ratsel ba luhpa wala kum baikan. Naha ba yabal ra impaki kan pyua ra takan. Sakuna baha pyua ra Retsel ra saura man takan, kan witin luhpa baiki kan taim pruan. Bibika lupia ba lika pain kan. Jekob mita nina Bensiman makan.

Yawan Jekob luhpia nani 12 ba dukyara wan auya tikaia apia sa, kan Israel nisanka aiska ba witin nani wina takan. Israel kyamka 12 nina ba sika, Jekob luhpia 10 bara Josep luhpia wal nina brisa. Aisak ba naha tuktika nani aisuban wina kau pyu ailal iwan, bara witin ai mula ailal bri kan ba dukyara uba lilia kan kaia sa. Sakuna kaisa mula mairin Dina ba dia takan sapa kaikaia.

Blasi sturka 29:32-35; 30:1-26; 35:16-19; 37:35.