Job Ba Gâd Ra Kasak Kan
Sturka 26
Job Ba Gâd Ra Kasak Kan
WAITNA siknis na dukyara kupiam ra latwan mai munras sa ki? Witin nina Job, bara mairin ba ai maîa sa. Witin Job ra dia win sapa nu sma ki? ‘Gâd ra latubisi prus’ win. Kaisa dia muni baku aisan sapa bara dia muni Job uba pât wauhwan ba dukyara sin kaikaia.
Job ba Jehova ra kasak luki bila wali waitnika kum kan. Witin Us tasbaia ra iwi kan, Kenan wina laiura apia. Jehova mita Job ra uba latwan kaiki kan, sakuna upla kum bara kan ba mita Job ra misbara kaiki kan. Ya mita misbara kaiki kan sapa nu sma ki?
Baha ba Setan Debil kan. Amya tikpara, Setan ba insal saura kum Jehova ra misbara kaiki ba. Witin sika Adam Iv wal Jehova bila lulkbia daukan, bara sip sa lukan upla wala nani sut ra Gâd bila lulkbia daukaia. Sakuna daukaia sip kan ki? Apia pali. Yawan waitna bara mairin kasakkira ailal nani lan takan ba dukyara luki kaiks. Sakuna baha uplika nina an nu sma ki?
Jekob Josep wal Idsipt ra pruan ningkara, Job ba sika tasba aiskara Jehova ra kau kasak lukan uplika kan. Jehova want kan Setan upla sut ra saura sakaia sip apia kan ba witin ra marikaia, baha mita Jehova Setan ra naku win: ‘Job nahki yang ra kasak wapni kat ba kaiks.’
Bara Setan mita Jehova ra win: ‘Kan man witin ra blisin bara diara ailal bri ba yabisma mita man ra kasak sa. Sakuna man baha nani ba mihta dakma sa kaka, witin lamtubia.’
Bara Jehova bila win: ‘Man wih dukya nani bri ba sut mihta daks bara witin ra dia saura munaia want sma sin muns. Sakuna ikpara, bara kaisa laitubia sapa kaikaia.’
Pas, Setan bui waitna nani kum kum Job bipka bara kyamilka nani ba implikbia daukan, bara ai syîpka nani sut ra ikan. Baku sin, Job luhpia waitna bara mairin 10 kan ba pasa tara kum wal ikan. Baha wina Job ra naha sikniska saura ba yaban. Job uba panis wauhwi kan. Baha mita ai maîa mairin ba bui win: ‘Gâd ra latubisi prus.’ Sakuna Job baku daukaia want apia kan. Baku sin, panika kuninkira nani yuhmpa bal, Job ba ai rayaka ra uba saura dauki ba mita baku takisa win. Sakuna Job ba Gâd ra ban kasak wapni kan.
Naha daukanka ba Jehova ra uba lilia sakan, bara ningkara lilka ra kaikisma ba baku, Gâd Job ra blisin ailal yaban. Job sikniska wina rakan. Bara kli luhpa painkira nani 10 yaban. Bara bip, syîp bara kyamil nani kainara bri kan ba wina dubil yaban.
Man Job baku Jehova ra ban kasak kama ki? Baku sma kaka, witin man ra sin blisin mai munbia. Tasba aiska na Eden gadinka painkira baku daukbia pyua ra, man raya ban kaiara iwaia sip kama.
