Sturka 24

Josep Ai Muihka Nani Ra Traika Kaikan

JOSEP ba ai muihka almuk 10 nani ba, latwan laka luha bara ban saura kan sapa nu takaia want kan. Baha mita ai muihka nani ra win: ‘Biki kakaira bangwisma. Man nani lika naha tasbaia tanka bara swapnika nani ba biki kaikaia balram.’

Bara witin nani bila: ‘Apia, yang nani bahamuna uplika apia sna. Yang nani upla pain sna. Sut na, muihki bangwisna. 12 bangwi kapri, sakuna kum ba pat pruan, kau sirpi ba aisiki wal utla ra sa.’

Josep ba tanka briras baku puli kan. Bara witin ai muihka nina Simeon maki kan ba ra yaban silak ra mangkan, sakuna wala nani ra swin ai watla ra plun brih wabia. Baha wina witin ai muihka nani ra kli naku aisan: ‘Kli bali bangwma taim, muihkam kau sirpi ba bri bal ai mariks.’

Witin nani kli Kenan ra wan pyua ra, ai aisika Jekob ra dia takan ba sut win. Bara Jekob ba uba sari taki, ini aisan: ‘Josep apu sa, nanara Simeon sin apu sa. Baha mita yang luhpi sirpi Bensiman na maikrika brih wama apia.’ Sakuna pata ba dan taki kan pyua ra, witin ai luhpia waitna Bensiman ba swin Idsipt ra brih wan kau plun briaia dukyara.

Josep ai muihka nani ba aula kan kaikan. Bara witin ai muihka sirpi Bensiman ra kaikan pyua ra uba lilia takan. Sakuna witin nani kumi sin naha waitnika kulkanka tara bri ba Josep kan ba lika nu apu kan. Bara Josep diara kum daukan, ai muihka nani 10 ba traika kaikaia dukyara.

Ai albika nani ra yaban ai muihka nani bikka ba plun wal bangkbia. Sakuna maisapahkras, ai kapka silba wal paskan ba Bensiman bikka bilara mangkbia yaban. Bara witin nani impaki wiria wihka ra wan pyua ra, Josep mita ai albika nani ra ninara blikan wan. Bara nina bliki alkan taim, nan aisan: ‘Dia muni dawanki silba kapka ba impliki bangwram ki?’

Sakuna witin nani bila: ‘Yang nani witin kapka impliki bangwras. Ban sakuna yang nani tilira plikrika, ya bri sakma kaka, baha ra iks.’

Baha mita albika nani ba bikka nani sut ra plikan, las kat lilka ra kaikisma ba baku Bensiman bikka bilara kan sakan. Bara albika nani bila: ‘Wala nani ba sip sa mahka waia, sakuna Bensiman lika yang wal balaia sa.’ Sakuna muihnika nani 10 ba mita, dia daukan luki?

Witin nani kli Bensiman wal Josep watla ra wan. Bara Josep mita ai muihka nani ra naku aisan: ‘Man nani kli wamtla ra waia sip sma, sakuna Bensiman lika takaski yang albiki takaia sa.’

Bara Juda lika aisan bara win: ‘Yang waitla ra tuktika na apu wamna sa kaka, aisiki ba prubia, kan witin tuktika na ra uba latwan kaikisa. Baha mita dupali, yang ra alba baku nara ai bris, sakuna tuktika ra swis wabia.’

Bara Josep nanara kaikan ai muihka nani ba sat wala takan. Latwan laka luha bara saura sin ban apia kan. Kaisa Josep dia daukbia sapa kaikaia.

Blasi sturka 42:9-38; 43:1-34; 44:1-34.