Josep Ra Misbara Kaiki Kan
Sturka 21
Josep Ra Misbara Kaiki Kan
NAHA wahmika nahki sari bara umpira ba kaiki kais! Witin ba Josep. Muihka nani mita bisiura naha uplika nani Idsipt ra auya ba ra atkan. Baha ra brisi alba baku bri kabia. Sakuna dia muni baku daukan ki? Josep ra tumi kan ba mita.
Jekob ba Josep ra uba latwan kaiki kan. Baha mita witin prak mina yari painkira kum dauki Josep ra yaban. Bara muihka almuk 10 ba Jekob mita Josep ra kau latwan kaiki kan ai dara walan taim, laui Josep ra misbara kaikan. Sakuna diara wala dukyara sin witin ra misbara kaiki kan.
Josep ba yaprisauhkan wal kaikan. Bara baha yaprisauhkanka wal sut ra, witin kaikan ai muihka nani ba bal ai mawanra bawi kan. Naha yaprisauhkanka dukyara ai muihka nani ra win taim, witin nani Josep ra kau misbara kaikan.
Yu kum, Josep muihka almuk nani ba ai aisa syîpka main kaiki kan pyua ra, Jekob mita Josep ra makaban ai muihka nani ba nahki sapa kaikaia wabia. Bara witin nani Josep aula kan kaikan taim, kum kum nani ba naku aisan: ‘Kaisa witin ra ikaia!’ Sakuna muihnika kau almuk, Ruben bila: ‘Apia, baku dauki bangwpara!’ Bara baha daukaia watlika ra, witin nani Josep ra liwahnta lawan kum ra dingkan. Baku bara Josep ba wal dia daukaia sapa iwi aisi bangwan.
Baha pyua ra Ismael kyamka nani ba aula kan. Bara Juda mita ai muihka nani ra win: ‘Kaisa Ismael kyamka nani ra atkaia!’ Baha mita baku dauki bangwan. Silba ma 20 mana Josep ra atkan wan! Nahki kat ai muihka wal saura bara latwan laka luha bangwi kan!
Witin nani ai aisa ra dia win? Guts kum iki, Josep praka painkira kata talya ra dingkan. Bara praka ba brihwi ai aisa Jekob ra win: ‘Naha kauhwan kan saki bangwri, bara Josep praka sa sapa laki kaiks.’
Jekob ba Josep praka kan kaikan. Bara witin ini naku aisan: ‘Daiwan wail kum mita Josep ra ikan kaia sa.’ Josep muihnika nani ba, ai aisa ba baku lukbia want kan. Bara Jekob ba uba sari taki, aihwa ini kan. Ban sakuna Josep ba pruras kan. Kaisa brihwan ba pliska ra witin ra dia takan sapa kaikaia.
