Sturka 33

Kabu Pauni Lui Bangwan

KAIKI KAIS naha ra dia taki ba! Ai dusa wal kabu Pauni purara sakbi bri ba Moses kan. Bara witin aikuki kabu un ra bangwi ba Israel uplika nani kan. Sakuna Fero ai suldiarka nani aikuki lika, kabu ra rungwi tiwan. Kaisa naha ba nahki takan sapa kaikaia.

Yawan pat lan takan ba baku, Gâd mita pât tara nani 10 ba Idsipt uplika nani ra bribalan ningkara, Fero mita Israel uplika nani ra swin wan. Bara witin nani Idsipt wina takan pyua ra, waitna baman 600.000 bara kan, mairin bara tuktan nani sin tilara kan. Baha purkara witin nani tilara upla wala nani Jehova ra kasak lukan kan nani ba sin aula kan. Idsipt wina takan taim kumi bani ba, ai syîpka, ai gutska bara ai bipka nani brih aula kan.

Bara witin nani kau Idsipt wina takras kan kainara, Idsipt uplika nani ra kwala, diara gul bara silba wal paskan dukya nani ba makabi bangwan. Kan Idsipt uplika nani ba, pât tara nani 10 ba takan ningkara uba sibri bangwi kan. Baha mita, witin nani ra Israel uplika nani dia makaban ba sut yabi bangwan.

Pyu kum kum luan ningkara, Israel uplika nani ba kabu Pauni ra bali bangwan. Bara witin nani baha ra wih wiria ris taki bangwan. Sakuna, Fero ai uplika nani aikuki Israel uplika nani ra swin wan ba dukyara kli ai kupia laki, naku aisi kan: ‘Yawan wan albika nani ra swin wan!’

Baku tnatka ra Fero ba kli ai kupia laki, minitka ra yaban ai suldiarka nani bara war waginka nani bri kan ba ridi daukan. Bara witin war waginka painkira nani 600 paskan bri kan ba, bara wagin wala nani Idsipt ra bara kan ba brih Israel uplika nani nina ra wan.

Bara Israel uplika ba, Fero ai war aiklaklabra daknika aikuki aula kan kaikan taim, uba sirang iwi bangwan. Witin nani ani ra plapaia sapa nu apu kan. Kan kabu Pauni ba ai lama kat bara kan. Bara Jehova bui, Idsipt uplika nani aula kan ba kainara kasbrika playka kum mangki bri kan. Baha mita, Idsipt uplika nani ba sip apia kan Israel uplika nani ra saura munaia, kan witin nani ra sip kaikras kan.

Bara Jehova mita Moses ra, ai dusa bri ba kabu Pauni purara sakbia win. Bara Moses baku daukan taim, Jehova bui lalma tani wina pasa karna kum yaban krauan. Bara kabu laya ba lilak baiki tnaya wal ba alki takaski bri kan.

Bara Israel uplika nani ba kabu lila pasra tasba lawan takan kan bak wapi bangwan. Upla milian nani ai daiwra aikuki kabu baila wala ra luaia dukyara awar ailal nit kan. Tnata kat Idsipt uplika mita Israel uplika nani ra kli kaiki bangwan, bara witin nani sin nina bliki, kabu bilara yabal kuawan kan bara dimi bangwan.

Baku daukan taim, Gâd mita waginka nani wilka ba yaban daiwi kauhwi kan. Idsipt uplika nani uba sirang iwi kisbi aisi win: ‘Kaisa yawan naha wina mahka waia! Jehova Israel uplika nani tawan wan mapara aiklabisa.’ Sakuna dan ai ninara sip tauras kan.

Nanara Jehova mita Moses ra ai dusa bri kan ba kabu Pauni purara sakbia win, lilka ra kaikram ba baku. Moses baku daukan taim li nani ba kli ai pliska ra kauhwan bara Idsipt uplika ai waginka nani aikuki pura prakan. War aiklaklabra daknika aiska ba kabu ra dimi bangwan kan. Bara Idsipt uplika kumi sin swakwi takras kan!

Gâd uplika nani ba raya lui bangwan ba mita uba lilia bangwi kan! Baha mita Jehova ra tingkika yabaia dukyara waitna nani ba lawana kum aiwani bangwan, bara win: ‘Jehova ba war aiklabi pura luanka tara kum brin. Witin aras bara purara uli uplika nani ra kabu ra rungki tikan.’ Miriam Moses lakrika ba sin ai drumka bri kan ba saki aiwanan, bara mairin wala nani sin witin nina bliki aiwanan. Bara witin nani dans puli naku aiwani bangwi kan: ‘Jehova ba war aiklabi pura luanka tara kum brin. Witin aras bara purara uli uplika nani ra kabu ra rungki tikan.’

Impakan sturka sapta 12 wina 15 kat.