King Saura Kum Idsipt Ra Aimakan
Sturka 27
King Saura Kum Idsipt Ra Aimakan
WAITNA nani naha ra kaiki sma ba mita, upla nani ba wark takbia dukyara taibi munisa. Wark tatakra kum ra kiwa wal nahki wipi ba kaiki kais! Wark tatakrika nani ba Jekob kyamka nani kan, bara witin nani ra Israel uplika nina maki kan. Sakuna taibi muni waitnika nani ba Idsipt uplika kan. Kan Israel uplika nani ra alba baku bri kan. Sakuna nahki muni baku takan ki?
Mani ailal bila ra, Jekob kyamka nani ba kupia kumi laka ra Idsipt kuntrika ra iwi kan. Kan king Fero ningkara Josep kulkanka tara bri kan ba mita witin nani ra main kaiki kan. Sakuna Josep ba pruan. Bara Fero wala Israel uplika nani ra misbara kaiki kan ba kum, Idsipt ra king aimakan.
Naha kingka saurkira na mita Israel uplika nani ra alba baku brin. Bara Israel uplika nani pura kaiki kaia wisi upla saura panis mumunra nani ra mangkan. Bara naha waitnika nani ba mita, Israel uplika ba Fero taun want kan nani ba paski kabia dukyara taibi muni kan. Ban sakuna baha pâtka nani tilara, Israel uplika ba kau ailal sahwi kan. Bara pyu lui bara, Israel uplika ba ailal sahwi kau karna takbia dukyara Idsipt uplika ba sibri kan.
King Fero ba dia daukan sapa nu sma ki? Grandi mairin Israel mairka nani luhpa baiki kan pyua ra help muni kan nani ra naku win: ‘Waitna lupia aisubia sa kaka iks.’ Sakuna naha mairka nani ba upla pain kan bara bibi waitna lupia aisubi kan nani ra ikras kan.
Baha taka mita, Fero ai uplika nani ra naha adarka yaban: ‘Israel tuktika waitna lupia nani ba ra sut iks. Sakuna tuktika mairin lupia nani ra lika raya swis.’ Baha adarka ba saura pali kan! Kaisa tukta waitna lupia kum ba nahki swakwi takan sapa kaikaia.
