Sturka 15

Lat Maîa Ba Ai Ninara Taui Kaikan

LAT ba ai pamalika aikuki Kenan tasbaia ra Ebraham lamara iwi kan. Bara yu kum Ebraham mita Lat ra naku aisan: ‘Naha ra wan daiwra nani dukyara tasba ailal apu sa. Bara pliskam pali kaisa dakwi taki bangwaia. Man sait kum ra wama sa kaka, yang sait wala ra wamna.’

Bara Lat tasba ba laki kaikan. Bara witin tasbaia piska kum li bara twi ailal bri kan kaikan ai daiwra nani dukyara. Baha ba Jordan tasbaia tani kan. Baha mita, witin ai pamalika bara ai daiwra nani aikuki baha ra wan. Sakuna tnata kat, witin nani Sadam taunka ra ai watla makan.

Sadam uplika ba uba saura bangwi kan. Lat upla pain kan ba mita, saura ai dara walan. Gâd sin saura ai dara walan. Tnata kat, Sadam bara lamara Gomora maki kan taunka nani ba uba saura dauki kan. Baha mita Gâd ai insalka wal ra blikan Sadam Gomora wal sauhki tikai ba dukyara Lat ra maisapahkbia.

Bara insalka nani ba mita Lat ra win: ‘Isti! Maîam bara luhpiam mairin nani ba brih naha wina taki was!’ Sakuna Lat ai pamalika wal uba wihka takaski kan, baha mita insal nani ba bui mihta ra alki taun bila wina sakan. Bara insalka kum ba mita win: ‘Rayakam dukyara plapi bangws! Bara ninam ra taui kaiki bangwpara. Il nani ba kat plapi was prui bangwma apia dukyara.’

Bara Lat ai luhpia mairin nani aikuki bila wali, Sadam wina plapi bangwan. Aima kumira sin takaski, ai nina ra taui kaikras kan. Sakuna Lat maîa ba bila walras kan. Witin nani Sadam wina taki plapi kau wihka waras kan bara, Lat maîa ba ai ninara taui kaikan. Baku bara Lat maîa ba sal walpaya takan. Lilka ra ba kakaia sip sma ki?

Yawan naha wina lisin pain kum lan takaia sip sa: ya Gâd bila wali nani ba swaki sakan kabia, sakuna bila walras nani ba ai rayaka tikbia.

Blasi sturka 13:5-13; 18:20-33; 19:1-29; Luk 17:28-32; 2 Pita 2:6-8.