Sturka 31

Moses, Eran Wal Fero Ra Wan

MOSES Idsipt ra kli taui wan taim, ai muihka Eran ra sain nani sturka ba win. Bara witin nani Israel uplika nani ra sainka nani dauki marikan taim, sut nani kasak luki bangwan.

Baha ningkara Moses Eran wal Fero kaikaia wan. Bara witin nani Fero ra win: ‘Jehova Israel Gâdka ba bila: ‘Upliki nani ra yu yuhmpa swis upla iwras tasbaia ra wih, ai mayuni bangwbia.’ ’ Sakuna Fero bila: ‘Yang lika Jehova ra mayunras sna. Bara Israel uplika nani ra swirka wabia apia.’

Fero ba uba ai kupia sauhkan, kan Israel uplika nani ba Jehova ra mayunaia dukyara wark taki bangwi kan ba wina taim saki bangwaia want kan. Baha mita witin nani ra taibi muni yaban kau karna wark taki bangwan. Bara Israel uplika nani ba baku munan ba dukyara pâtka ba Moses ra kahban, bara Moses ba sari takan. Sakuna Jehova mita Moses ra sari takbia apia win. Bara Jehova bila: ‘Yang Fero ra munrika upliki nani ba swirka wabia.’

Bara Moses Eran wal kli Fero mawanra wan. Sakuna baha pyua ra witin nani sain kum daukan. Eran dus ai mihta ra bri kan ba tasba ra lulkan taim, dusa ba pyuta tara kum takan. Sakuna Fero sinskira nani ba sin, dus nani bri kan ba tasba ra lulkan taim dusa nani ba pyuta takan. Sakuna kaiki kais! Eran pyutka ba mita sinskira nani pyutka ba ra pi ba. Baha nani daukan sakuna Fero ba Israel uplika nani ra swin waras kan.

Baha mita, Fero klala briaia pyua ba aimakan kan. Jehova mita dia daukan sapa nu sma ki? Idsipt kuntrika ba mapara pât tara nani 10 bribalan.

Pât tara kum kum nani luan ningkara, Fero mita Moses ra winan balan, naku win: ‘Pâtka tara nani na alki takas bara yang Israel uplika nani ra swirka wabia.’ Sakuna pâtka tara nani ba alki takaski kan pyua ra, witin ai lukanka ba sat wala laki kan. Israel uplika nani ra swin waras kan. Sakuna pâtka tara 10 ba daukan ningkara, Israel uplika nani ra swin wan.

Pât tara 10 kumi bani ba man lan takram sa ki? Wahya wala ra laks, bara kaisa ani nani kan sapa kaikaia.

Impakan sturka 4:27-31; 5:1-23; 6:1-13, 26-30; 7:1-13.