Sturka 32

Pât Tara Nani 10 Ba

LILKIKA nani na kaiki kais. Kumi bani ba ra wan marikisa, Jehova Idsipt kuntrika ra dia sat pâtka bribalan ba. Pas lilkika ba ra man sip sma kaikaia Eran ai dusa wal Nail awalka ra pruki ba. Bara witin baku daukan pyua ra, awalka ba tala ra tauan. Bara inska nani ba sut prui bangwan, bara awalka ba bisbaia takan.

Ningkara, Jehova mita awalka ba wina yaban pikpik nani takan. Bara pikpikka nani ba plis sut ra bara kan, kubus ra, plauar akbaia panka ra bara krikri nani ra sin. Bara pikpik nani ba pruan taim, Idsipt uplika nani ba mita ailal ra paski swin, bara kuntri aiska ba bisbaia takan.

Baha wina, Eran ai dusa wal tasba ra prukan, bara tasba yuya ba klaksa nani, daiwan sirpi lupia nani pâli, upla ra sami ba takan. Bara naha ba, pât tara yuhmpika ba Idsipt kuntrika ra takan kan.

Sakuna pâtka tara wala nani ba Idsipt uplika nani ra baman rau muni kan, Israel uplika nani ra lika apia. Bara pât tara walhwalka ba, kukas tara nani taki Idsipt uplika nani watla ra dimi kan. Pâtka tara matsipka ba, daiwan nani ra insauhkan. Bara Idsipt uplika nani bipka, syîpka bara gutska nani ailal prui bangwan.

Baha ningkara, Moses Eran wal yahmpus wiria ai mihta ra brih pasa ra lulkan. Bara naha nani ba, upla bara daiwan nani ra taya sukwanka bri balan. Bara baha ba pât tara 6 ba kan.

Baha wina, Moses ai mihta ba kasbrika purara bukan, bara Jehova mita alwani bara ais ma nani kasbrika pura wina yaban kauhwan. Idsipt ra taki kan ba wina, naha ba kau saura kan.

Pâtka tara 8 ba ra, kruhkru dakni tara ailal takan. Bara baha pyua kan ra ningkara sin kruhkru nani baku takan kaikras kan. Ais ma nani diara sauhkras kan nani ba, kruhkru mita sut pih dan daukan.

Pâtka tara 9 ba ra, tihmia tara iwan. Yu yuhmpa ra, kuntri aiska ba tihmu tara ra kan, sakuna Israel uplika nani iwi kan pliska ra lika ingni man kan.

Tnata kat, Gâd mita ai uplika nani ra, ai watla durka plamaika nani ra guts apia kaka syîp talya wal laiki bangwbia win. Baha ningkara Gâd insalka ba Idsipt taunka bila bak luan. Bara insalka ba ani watla ra tala laikan kaiki kan pyua ra, witin baha watla ra upla kumira sin ikras kan. Sakuna ani watla ra tala laikan kaikras kan ba ra, witin upla bara daiwan luhpia tawahkia nani sut ra ikan. Bara baha ba pât tara 10 ba kan.

Naha pâtka tara takan ningkara, Fero Israel uplika nani ra swin wan, kan witin nani pat ridi bangwi kan, baha mita witin nani baha sim tihmika Idsipt wina impaki bangwan.

Impakan sturka sapta 7 wina 12 kat.