Lisin 10

Daukanka nani Gâd misbara kaiki ba

Gâd saura kaiki dukya nani ba, man nahki kaikaia sma ki? (1)

Dia sat rugka laka ba saura sa ki? (2)

Gâd uplika ba kunin laka ba nahki kaikaia sa ki? (3) Lalah mana pulaia? (3) Implikaia? (3) Rau munanka laka? (4) Sukia laka? (5) Bara bla takaia? (6)

Nahki muni daukanka saura wina dakwi takaia sip sa ki? (7)

1. Gâd uplika ba diara pain ba latwan kaikisa, sakuna diara saura misbara kaikaia ba sin lan takaia sa (Lawana 97:10). Baha tanka ba sika Gâd misbara kaiki daukanka nani ba wina laiura takaia. Ani baha muna daukanka kum kum bangwisa ki?

2. Rug laka: Marit takras rug takaia, marit laka sauhkaia, daiwan wal rug takaia, ai taya bara ai tahkia wal rug takaia ba sin Gâd nakra ra saurka tara kum sa (Libait laka 18:6; Rom 1:26, 27; 1 Korint 6:9, 10). Waitna bara mairin kum wal marit takras iwisa kaka, dakwi takaia sa apia kaka lâ kat marit takaia (Hibru nani 13:4).

3. Kunin laka, lalah mana pulaia, implikaia: Jehova Gâd ba kunin aisaras (Taitus 1:2). Baha mita witin yamni wan kaikbia want sa kaka kunin aisaia apia sa (Sins laka 6:16-19; Kolosi 3:9, 10). Lalah mana pulanka nani dauki ba sut, gridi laka ra brihwisa. Baha mita kristian nani ba latri apia kaka lalah mana pulanka sat sat ba pulras (Epesus 5:3-5). Baku sin implikras, implikan dukya nani  atkras bara adar sakras kaka upla dukya brihwaras (Imapakan sturka 20:15; Epesus 4:28).

4. Kupia baiwanka, rau munanka laka: Kupia baiwanka sip alki takaskras ba rau munanka ra brihwaia sip sa (Blasi sturka 4:5-8). Rau mamunra nani ba sip Gâd panika kapras (Lawana 11:5; Sins laka 22:24, 25). Upla kum saura wan munan ba tawan pana saura munaia ba pain apia sa (Sins laka 24:29; Rom 12:17-21).

5. Sukia laka: Upla kum kum ba spirit saura nani ra winisa siknis wina rakbia dukyara. Wala sin ai waihla nani siknis takbia apia kaka ikaia wisi sîka munisa. Naha daukanka ta bri ba sika Setan. Baha mita kristian nani ba naha dukya nani na daukras (Kli smalkan 18:9-13). Sukia laka wina wan kaina kahbaia dukyara, Jehova lamara ban kaia sa (Sins laka 18:10).

6. Bla takaia: Wain, bir apia kaka laya tahpla sat wala kum wiria diaia ba saura apia sa (Lawana 104:15; 1 Timoti 5:23). Ban sakuna, uba diaia bara bla takaia ba Gâd saura pali kaikisa (1 Korint 5:11-13; 1 Timoti 3:8). Uba diaia ba wînam yamnika bara pamalikam ra sin sauhkaia sip sa. Baha purkara, saurka wala nani ra maikka kauhwaia sip sma (Sins laka 23:20, 21, 29-35).

7. Gâd saura kaiki dukya nani dauki uplika ba “Gâd King aimaki” ba laka bribia apia (Galesha 5:19-21). Man rait pali Gâd ra latwan kaikisma bara ai dukya daukaia brinkam sa kaka, naha daukanka saura nani ba wina dakwi takaia sip kama (1 Jan 5:3). Gâd saura kaiki dukya nani ba misbara kaikaia lan taks (Rom 12:9). Diara pain dauki uplika aikuki tauki bas (Sins laka 13:20). Wan panika kristian almuk nani ba help tara wankaia sip sa (Jems 5:14). Bara diara sut purkara, pura sunra bak Gâd helpka ba pliks (Pilipai 4:6, 7, 13).

[Wahya 20 bara 21 lilkika nani ba]

Implikaia, lalah mana pulaia, bla bara rau munaia ba Gâd misbara kaikisa