Lisin 4

Debil ba ya sa ki?

Nahki Setan Debil ba takan ki? (1, 2)

Nahki upla ra kunin munisa ki? (3-7)

Dia muni Debil mapara bapi buaia sma ki? (7)

1. Bila “Debil” ba sika, upla kum upla wala dukyara kunin aisi ba tanka sa. “Setan” ba waihla apia kaka mapara babura tanka sa. Bila nani na Gâd waihlka lalka pali ba dukyara aisisa. Taura, witin ba insal kasakkira kum kan bara Gâd wal heven ra iwi kan. Sakuna ningkara, tara puli Gâd mayunra ba witin briaia luki kan (Matyu 4:8-10).

2. Naha insalka Setan na mita, Iv ra pyuta kum bakku aisi kunin munan, bara Iv ba Gâd bila lulkbia daukan. Naha tnatka ra, Setan mita Gâd “King aimakaia raitka” bri ba, wibia sa kaka, Gâd karnika sut bri kaia raitka ba mapara buan. Gâd ba pain king aimakisa sapa bara Ai uplika nani yamnika dukyara aimakisa sapa sin Setan mita nahmpa nahmpa lukanka ra mangkan. Bara upla kumi sin ban wihka Gâd ra kasak kabia apia win. Naku daukisi Gâd waihlka takan. Baha mita Setan Debil makisa (Blasi sturka 3:1-5; Job 1:8-11; Param marikan 12:9).

3. Witin ra mayunbia dukyara, Setan upla ra kunin munaia trai kaikisa (2 Korint 11:3, 14). Rilidian kuninkira ba tnatka kum sa. Rilidian kum ba Gâd dukyara kunin smalkisa kaka, Setan kupia laka daukisa (Jan 8:44). Rilidian kuninkira nani ra wi uplika ba, ai kupia aiska ni Gâd kasakkira ra mayunisa lukbia kra, sakuna raitka pali ba sika, Setan warkka daukisa, kan witin ba “naha tasba gâdka” sa (2 Korint 4:4).

4. Setan upla ra kunin munaia dukyara sukia laka ba yus munisa. Upla kum kum ba, spirit saura nani ai kaina kahbia, upla wala ra saura munbia, kaina pyua ra dia takbia ba wibia apia kaka sain nani daukbia dukyara winisa. Karnika saurakira naha daukanka ta bri ba sika Setan. Gâd yamni wan kaikbia kaka, sukia laka ra dimras kaia sa (Kli smalkan 18:10-12; Wark nani 19:18, 19).

5. Ai kyamka tawan tara pulaia bara pulitik asla takanka nani ra mayunaia ba sin, Setan upla ra kunin munaia dukyara yus munisa. Upla kum kum lukisa ai kyamka ba kyamka wala nani ba wal kau tara sa. Sakuna baku apia sa (Wark nani 10:34, 35). Wala nani sin tasba trabilka nani ba pulitik asla takanka  nani mita wapnika mangkbia lukisa. Baku tnatka ra, Gâd kingka laka baman trabil nani sut tnata mangkaia sip ba ra, tnayara laki bangwisa (Danyal 2:44).

6. Wîna brinka saura nani traika kaikanka ba wal sin, Setan mita upla ra kunin munisa. Daukanka taski nani pât ra wan dingkaia sip ba mita Jehova bila baha wina laiura kabia wisa (Galesha 6:7, 8). Upla kum kum want kabia kra, man sin baha daukanka nani tilara kama. Sakuna kupiam krauks, Setan sika want sa man baku daukma (1 Korint 6:9, 10; 15:33).

7. Man Jehova ra lulki swima dukyara, Setan mita nina bliki rau munanka laka apia kaka mapara buanka laka daukaia sip sa. Man Baibil stadi takisma ba mita, ban kra pamalikam kum kum ba ai kupia sauhkbia. Wala nani lamwaska kikbia kra sin. Sakuna, rayakam ba ya maikan ki? Jehova tanka lan takisma ba swima dukyara Setan sirang mai ikaia want sa. Yarka puram lubiara (Matyu 10:34-39; 1 Pita 5:8, 9). Debil mapara bapi buma bara, Jehova kupia lilia daukma bara Witin King aimakaia raitka bri ba ra ta baikisma ba sin marikma (Sins laka 27:11).

[Wahya 9 lilkika nani ba]

Sukia laka ba, rilidian kuninkira ba bara kyamka tawan tara pulaia ba sin upla ra kunin musisa

[Wahya 9 lilkika nani ba]

Jehova tanka kau lan taki Setan mapara bapi bus