Lisin 6

Gâd Kingka laka ba dia sa ki?

Gâd Kingka laka ba anira sa ki? (1)

Kingka ba ya sa ki? (2)

Upla wala King ba wal aimakbia ki? Au sa kaka, upla an bangwisa? (3)

Yawan tnata pyua ra iwi ba nahki nu sa ki? (4)

Kaina pyua ra Gâd Kingka laka ba upla nani dukyara dia daukbia ki? (5-7)

1. Jisas tasba ra kan pyua ra, ai nina blablikra nani ra, ai pura sunra ra Gâd Kingka laka makabaia dukyara lan daukan. King laka kum ba, gabamint kum ai kingka aimaki bri ba tanka dukyara aisisa. Gâd Kingka laka ba gabamint aihka painkira kum sa. Heven ra sa bara tasba purara king aimakbia. Gâd nina ba hulikira daukbia. Bara yabia Gâd kupia laka heven ra dauki ba baku tasba ra sin daukbia (Matyu 6:9, 10).

2. Gâd mita pramis munan Ai Kingka laka Kingka ba Jisas kabia (Luk 1:30-33). Jisas tasba ra kan bara, King kum kupia pihnikira, kasakkira bara saurka luha kabia ba marikan. Witin heven ra wan minitka ra King mangkras kan (Hibru nani 10:12, 13). Jehova mita karnika yabaia pramis munan kan ba 1914 manka ra yaban. Baha pyua wina, Jisas ba heven ra King aimakisa (Danyal 7:13, 14).

3. Jehova tasba wina waitna bara mairin lalukra kum kum heven ra wabia dukyara sin wahbi brin. Naha uplika ba king, wihta bara prîst nani baku Jisas wal king aimakbia (Luk 22:28-30; Param marikan 5:9, 10). Witin wal king aimakbia uplika ba dakni sirpi kum sa. Bara 144.000 bangwisa (Luk 12:32; Param marikan 14:1-3).

4. Jisas king aimakan ningkara, Setan bara ai insalka saurakira nani ra heven wina kangbi saki tasba ra lulkan. Baha mita 1914 manka ba wina tasba ra trabil nani ba kau saura taki auya sa (Param marikan 12:9, 12). War, plun wauhwanka, siknis, saurka laka pawan ba sin, naha sut na tasba daukanka saura nani tnata baila ba bara Jisas king aimakan ‘sainka’ atia sa (Matyu 24:3, 7, 8, 12; Luk 21:10, 11; 2 Timoti 3:1-5).

5. Sepad kum ai syîpka nani ba guts nani wina saitra saki ba baku, Jisas mita lâka dauki muni upla ra saitra sakbia. Witin ra kasak kan uplika ba “syîp nani” baku kulkbia, bara tasba ra raya ban kaia laka yabaisa. Bara Gâd Kingka laka mapara buan uplika ba “guts nani” baku kulkbia (Matyu 25:31-34). Tisku kaina pyua ra, Jisas bui guts baku uplika nani ra sauhki tikan kabia (2 Tesalonaika 1:6-9). Man Jisas “syîpka nani” kum kaia want sma sa kaka, King laka maisapahkanka ra wali dia lan takisma ba rayakam ra alki brih daukaia sma (Matyu 24:14).

6. Tasba aiska na kuntri sat sat ra baiki sakan sa, bara kumi bani ba ai gabamintka brisa. Nisan nani ba pana pana aiklabi bangwisa. Sakuna tasba gabamintka sut watlika ra Gâd Kingka laka ba aimakaisa. Tasba aiskara naha gabamintka na baman ba ra kabia (Danyal 2:44). Bara lika war, watauan laka bara blahwan laka sin apu kabia. Upla sut ba asla kupia kumi laka ra iwbia (Maika 4:3, 4).

7. Jisas 1.000 mani king aimaki kabia bilara, upla kasak nani ba saurka laka luha kabia bara tasba aiska na paradais kum ra lakbia. Gâd dia want kan ba sut, 1.000 mani tnata ra Jisas dan daukan kabia. Bara King laka ba ai Aisa mihta ra mangkbia (1 Korint 15:24). Pamalikam bara pamnika nani ra Gâd Kingka laka dia daukai ba dukyara aisama ki?

 [Wahya 13 lilkika ba]

Jisas gabamintka ra, upla ra aihka misbara kaikras kabia